Pad Dziaržynskam vałanciory zrabili žyllo dla biazdomnych katoŭ. Miascovyja žychary heta nie acanili

Z redakcyjaj vydańnia Blizko.by źviazalisia vałanciory hramadskaj arhanizacyi «Vyratavańnie žyvioł» i raskazali, ź jakoj prablemaj jany sutyknulisia, pasprabavaŭšy palepšyć žyćcio biazdomnym žyviołam kala sadovaha tavarystva «Piacihorje-5» Dziaržynskaha rajona.

Vałanciory pastavili dźvie ŭcieplenyja pienapleksavyja chatki dla katoŭ. Jany prościeńkija, ale abaronienyja ad vietru i apadkaŭ.

Pa słovach vałancioraŭ, u tavarystvie raspładziłasia šmat biazdomnych katoŭ. Raniej tam užo stajała adna prostaja płastykavaja chatka, i niekatoryja dačniki pakidali dla katoŭ ježu. Ciapier takich chatak stała try. 

Chatki pastavili na nievialikim «piatačku» z drevami i kustami za mastkom praz kanał, u vierchniaj častcy karty.

U minułuju niadzielu ŭ vałancioraŭ adbyłasia sutyčka ź miascovymi žycharami, paśla čaho chatki byli całkam razburanyja.

Vałanciory padzialilisia z Blizko.by videazdymkaj. Na adnym ź videa spačatku ŭ kadry źjaŭlajecca žančyna, jakaja abvinavačvaje vałancioraŭ u tym, što tyja kormiać biazdomnych katoŭ:

«Što vy robicie? Kali ich nie karmić, ich tut nie budzie. Dyk navošta vy ich kormicie, kali jany nie vašy?! […] Što vy, b***, tut narabili?!»

Taksama žančyna śćviardžaje, što jość zakon, jaki zabaraniaje karmić biazdomnych žyvioł. I što ad hetych katoŭ niaščaści:

«Tut ludzi, voś ich sabaka, voś ich dzicia, — zachvareła mikrasparyjaj».

Žančyna paabiacała vyklikać učastkovaha.

Na druhim videa žančyna ŭ kadry z mužčynam, jaki zajaviŭ, što jon staršynia sadovaha tavarystva, ale svajho imia nie nazvaŭ. Paźniej vałanciory vyśvietlili, što sapraŭdnaha staršyniu kličuć Alaksandr Rapinski.

«Značyć, ja vam pradstaŭlajusia. Ja staršynia hetaha tavarystva, hetaja terytoryja zamacavanaja za našym tavarystvam».

Jon zajaviŭ, što kacinyja chatki raźmieščanyja na ich terytoryi. U jakaści dokazu hetaha jon raskazaŭ, što tavarystva płaciła 1 miljon rubloŭ (biez udakładnieńnia, za što mienavita). Paśla čaho mužčyna adpraviŭsia zdymać kacinyja chatki na videa sa słovami, što videafajł i budzie śviedkam.

Miarkujučy pa karcie Nacyjanalnaha kadastravaha ahienctva, terytoryja z kacinymi chatkami za kanałam z mastkom nie naležyć sadovamu tavarystvu.

Jak kažuć vałanciory, jany viarnulisia da kacinych chatak praz paŭtary hadziny i zaśpieli ich całkam razburanymi. 

Taksama jany raskazali, što raniej u čacie vałancioraŭ źjaŭlałasia infarmacyja, što ŭ tym miescy bačyli rasstaŭlenyja na žyvioł pietli, a niekalki hadoŭ tamu katoŭ atrucili.

Vałanciory napisali zajavu ŭ Dziaržynski RAUS.

Kamientary da artykuła