Pucin atrymaŭ płan Trampa, ale nastrojeny praciahvać vajavać

Prezident Rasii Uładzimir Pucin na naradzie z pastajannymi členami svajoj Rady biaśpieki paviedamiŭ, što Rasija atrymała tekst prapanavanaha ZŠA mirnaha pahadnieńnia z Ukrainaj z 28 punktaŭ.

Uładzimir Pucin. Fota: Vyacheslav Prokofyev, Sputnik, Kremlin Pool Photo via AP

Hety dakumient padrychtavali kiraŭnik Rasijskaha fondu pramych inviestycyj Kirył Dźmitryjeŭ i śpiecpasłańnik prezidenta ZŠA Styŭ Uitkaf. Pucin adznačyŭ, što płan nahadvaje prapanovy, jakija abmiarkoŭvalisia na jahonaj sustrečy z Donaldam Trampam na Alascy, kali Tramp navat byŭ hatovy pakinuć sustreču, pačuŭšy pazicyju Rasii.

Pucin zajaviŭ, što hety płan moh by stać asnovaj dla kančatkovaha ŭrehulavańnia, ale, pavodle jaho słoŭ, z Rasijaj jaho pradmietna nie abmiarkoŭvajuć, bo ZŠA nijak nie mohuć atrymać zhodu Ukrainy. «Ukraina suprać», — adznačyŭ rasijski kiraŭnik.

Taksama Pucin padkreśliŭ, što Rasiju zadavalniaje chada vajny, bo «jana viadzie da dasiahnieńnia metaŭ vajennym šlacham». Jon zajaviŭ, što rasijskija vojski jašče 4 listapada nibyta «całkam zaniali Kupiansk».

Pucin papiaredziŭ, što kali Kijeŭ nie choča abmiarkoŭvać prapanovy Trampa, to pavinien razumieć: toje, što adbyłosia pad Kupianskam, moža paŭtarycca i na inšych klučavych učastkach frontu.

Pra nibyta zachop rasijskimi vojskami horada Kupianska ŭ Charkaŭskaj vobłaści ŭčora Pucinu dałažyŭ načalnik rasijskaha Hienieralnaha štaba Valeryj Hierasimaŭ. Ale inšych paćviardžeńniaŭ hetaha niama: navat rasijskija vajennyja błohiery i prapahandysty adkryta krytykujuć kamandavańnie armii za niedakładnyja raparty.

Kamientary da artykuła