U ŚMI źjaviłasia poŭnaja viersija «mirnaha płana» prezidenta ZŠA Donalda Trampa. Jaje pieršym apublikavaŭ narodny deputat Ukrainy Alaksiej Hančarenka.
1. Suvierenitet Ukrainy budzie paćvierdžany.
2. Pamiž Rasijaj, Ukrainaj i Jeŭropaj budzie zaklučanaje poŭnaje i usioachopnaje pahadnieńnie ab nienapadzie. Usie nieadnaznačnaści apošnich 30 hadoŭ buduć ličycca ŭrehulavanymi.
3. Čakajecca, što Rasija nie budzie ŭryvacca ŭ susiednija krainy, a NATA nie budzie pašyracca dalej.
4. Budzie praviedzieny dyjałoh pamiž Rasijaj i NATA pry pasiarednictvie ZŠA dla vyrašeńnia ŭsich pytańniaŭ biaśpieki i stvareńnia ŭmoŭ dla deeskałacyi, kab harantavać hłabalnuju biaśpieku i pavialičyć mahčymaści dla ŭzajemadziejańnia i budučaha ekanamičnaha raźvićcia.
5. Ukraina atrymaje nadziejnyja harantyi biaśpieki.
6. Kolkaść Uzbrojenych sił Ukrainy budzie abmiežavanaja 600 000 čałaviek.
7. Ukraina pahadžajecca zamacavać u svajoj kanstytucyi, što jana nie dałučycca da NATA, a NATA zhadžajecca ŭklučyć u svaje statuty pałažeńnie ab tym, što Ukraina nie budzie pryniataja ŭ budučyni.
8. NATA zhadžajecca nie raźmiaščać vojski va Ukrainie.
9. Jeŭrapiejskija źniščalniki buduć raźmieščanyja ŭ Polščy.
10. Harantyja ZŠA:
- ZŠA atrymajuć kampiensacyju za harantyju.
- Kali Ukraina ŭryvajecca ŭ Rasiju, jana stracić harantyju.
- Kali Rasija ŭryvajecca va Ukrainu, akramia rašučaha skaardynavanaha vajennaha adkazu buduć adnoŭlenyja ŭsie hłabalnyja sankcyi, pryznańnie novaj terytoryi i ŭsie inšyja pieravahi hetaj uhody buduć skasavanyja.
- Kali Ukraina biez pryčyny vypuścić rakietu pa Maskvie ci Sankt-Pieciarburhu, harantyja biaśpieki budzie ličycca niesapraŭdnaj.
11. Ukraina maje prava na siabroŭstva ŭ ES i atrymaje karotkaterminovy prefierencyjny dostup na jeŭrapiejski rynak, pakul hetaje pytańnie razhladajecca.
12. Mahutny hłabalny pakiet mier pa adnaŭleńni Ukrainy, jaki ŭklučaje, ale nie abmiažoŭvajecca:
a. stvareńnie Fondu raźvićcia Ukrainy dla inviestavańnia ŭ haliny, jakija chutka rastuć, uklučajučy technałohii, centry apracoŭki danych i štučny intelekt.
b. ZŠA buduć supracoŭničać z Ukrainaj dla sumiesnaha adnaŭleńnia, raźvićcia, madernizacyi i ekspłuatacyi hazavaj infrastruktury Ukrainy, uklučajučy trubapravody i schoviščy.
c. sumiesnyja namahańni pa adnaŭleńni terytoryj, jakija paciarpieli ad vajny, dla adnaŭleńnia, rekanstrukcyi i madernizacyi haradoŭ i žyłych rajonaŭ.
d. raźvićcio infrastruktury.
e. zdabyča karysnych vykapniaŭ i pryrodnych resursaŭ.
f. Suśvietny bank raspracuje śpiecyjalny pakiet finansavańnia dla paskareńnia hetych namahańniaŭ.
13. Rasija budzie reintehravanaja ŭ suśvietnuju ekanomiku:
a. źniaćcie sankcyj budzie abmiarkoŭvacca i ŭzhadniacca paetapna i indyvidualna.
b. ZŠA zaklučać doŭhaterminovaje pahadnieńnie ab ekanamičnym supracoŭnictvie z metaj uzajemnaha raźvićcia ŭ śfierach enierhietyki, pryrodnych resursaŭ, infrastruktury, štučnaha intelektu, centraŭ apracoŭki danych, prajektaŭ pa zdabyčy redkaziamielnych mietałaŭ u Arktycy i inšych uzajemavyhadnych karparatyŭnych mahčymaściach.
c. Rasija budzie zaprošanaja viarnucca ŭ G8.
14. Zamarožanyja srodki buduć vykarystanyja nastupnym čynam: 100 miljardaŭ dalaraŭ zamarožanych rasijskich aktyvaŭ buduć inviestavanyja va ŭznačalenyja ZŠA namahańni ŭ adnaŭleńni i inviestavańni va Ukrainu. ZŠA atrymajuć 50% prybytku ad hetaha pradpryjemstva. Jeŭropa dadaść 100 miljardaŭ dalaraŭ, kab pavialičyć abjom inviestycyj, dastupnych dla adnaŭleńnia Ukrainy. Zamarožanyja jeŭrapiejskija srodki buduć razmarožanyja.
Astatniaja častka zamarožanych rasijskich srodkaŭ budzie inviestavanaja ŭ asobny amierykanska-rasijski inviestycyjny instrumient, jaki budzie realizoŭvać sumiesnyja prajekty pa peŭnych napramkach. Hety fond budzie nakiravany na ŭmacavańnie adnosin i pavieličeńnie ahulnych intaresaŭ, kab stvaryć mocnuju matyvacyju nie viartacca da kanfliktu.
15. Budzie stvorana sumiesnaja amierykanska-rasijskaja pracoŭnaja hrupa pa pytańniach biaśpieki dla sadziejničańnia i zabieśpiačeńnia vykanańnia ŭsich pałažeńniaŭ hetaha pahadnieńnia.
16. Rasija zamacuje zakanadaŭča palityku nienapadu na Jeŭropu i Ukrainu.
17. ZŠA i Rasija damoviacca padoŭžyć dziejańnie damoŭ ab nieraspaŭsiudžvańni jadziernaj zbroi i kantroli nad joj, uklučajučy dahavor SNU-1.
18. Ukraina zhadžajecca być biaźjadziernaj dziaržavaj u adpaviednaści z Damovaj ab nieraspaŭsiudžvańni jadziernaj zbroi.
19. Zaparožskaja atamnaja elektrastancyja budzie zapuščanaja pad nahladam MAHATE, a vyrablenaja elektraenierhija budzie raźmiarkoŭvacca paroŭnu pamiž Rasijaj i Ukrainaj — 50:50.
20. Abiedźvie krainy abaviazvajucca ŭkaraniać adukacyjnyja prahramy ŭ škołach i hramadstvie, nakiravanyja na razumieńnie i talerantnaść da roznych kultur i likvidacyju rasizmu i praduziataściaŭ:
a. Ukraina prymie praviły ES pa relihijnaj talerantnaści i abaronie moŭnych mienšaściaŭ.
b. abiedźvie krainy damoviacca admianić usie dyskryminacyjnyja miery i harantavać pravy ŭkrainskich i rasijskich ŚMI i adukacyi.
c. Usia nacysckaja ideałohija i dziejnaść pavinny być adprečanyja i zabaronienyja.
21. Terytoryja:
a. Krym, Łuhansk i Danieck buduć pryznanyja de-fakta rasijskimi, uklučajučy Złučanymi Štatami.
b. Chierson i Zaparožža buduć zamarožanyja pa linii sutyknieńnia, što budzie aznačać de-fakta pryznańnie pa linii sutyknieńnia.
c. Rasija admaŭlajecca ad inšych uzhodnienych terytoryj, jakija jana kantraluje za miežami 5 rehijonaŭ.
d. Ukrainskija siły vyvodziacca z častki Danieckaj vobłaści, jakuju jany ciapier kantralujuć, i hetaja zona advodu budzie ličycca niejtralnaj demilitaryzavanaj bufiernaj zonaj, mižnarodna pryznanaj jak terytoryja, jakaja naležyć Rasijskaj Fiederacyi. Rasijskija siły nie ŭvojduć u hetuju demilitaryzavanuju zonu.
22. Paśla ŭzhadnieńnia budučych terytaryjalnych damoŭlenaściaŭ i RF, i Ukraina abaviazvajucca nie mianiać hetyja damoŭlenaści siłavym sposabam. Lubyja harantyi biaśpieki nie buduć prymianiacca ŭ vypadku parušeńnia hetaha abaviazacielstva.
23. Rasija nie budzie pieraškadžać vykarystańniu Ukrainaj raki Dniapro dla kamiercyjnaj dziejnaści, i buduć dasiahnutyja damoŭlenaści ab svabodnaj transparciroŭcy zbožža praz Čornaje mora.
24. Budzie stvorany humanitarny kamitet dla vyrašeńnia adkrytych pytańniaŭ:
a. usie tyja, chto zastalisia ŭ pałonie i cieły buduć abmienieny pa pryncypie «usie na ŭsich».
b. usie cyvilnyja zatrymanyja i zakładniki buduć viernutyja, uklučajučy dziaciej.
c. budzie realizavanaja prahrama ŭźjadnańnia siemjaŭ.
d. buduć pryniatyja miery dla palahčeńnia pakut achviar kanfliktu.
25. Ukraina praviadzie vybary praz 100 dzion.
26. Usie baki, uklučanyja ŭ hety kanflikt, atrymajuć poŭnuju amnistyju za dziejańni padčas vajny i pahodziacca nie pradjaŭlać pretenzij i nie razhladać skarhi ŭ dalejšym.
27. Heta pahadnieńnie budzie jurydyčna abaviazkovym. Jaho vykanańnie budzie kantralavacca i harantavacca radaj miru, uznačalenaj prezidentam Donaldam Trampam. Za parušeńni buduć praduhledžanyja sankcyi.
28. Paśla ŭzhadnieńnia ŭsich bakoŭ z hetym miemarandumam spynieńnie ahniu ŭstupić u siłu nieadkładna paśla taho, jak abodva baki adyduć da ŭzhodnienych punktaŭ dla pačatku vykanańnia pahadnieńnia.
Ciapier čytajuć
Pamiatajecie ŭkrainku, jakuju rasijanie pryviazali da słupa? Tyja, chto jaje katavaŭ, za hady vajny amal usie zahinuli. A voś što robić ciapier jana2424
Kamientary