«Płaču padatki, a što ŭzamien?» Biełaruska raskazała, jak niavyhadna być samazaniataj

Majstar pa manikiury zajaviła ŭ TikTok, što być samazaniataj u Biełarusi niavyhadna, bo apłata padatkaŭ nie daje anijakich sacyjalnych harantyj. Jaje słovy vyklikali dyskusiju, piša BGmedia.

«Płaču padatki, a što atrymlivaju ŭzamien?»

Žančyna raskazała, što jak samazaniataja spłačvaje kala 10% padatkaŭ — amal 400 rubloŭ u miesiac. Ale, pa jaje słovach, heta nie daje joj ni sacyjalnych harantyj, ni padtrymki: «U mianie zachvareła dzicia, i ja nie mahu pajści na balničny — mnie jaho nichto nie apłacić. Toje samaje z adpačynkam. Ja mahu ŭziać jaho raz u try miesiacy, ale apłačvać mnie jaho nichto nie budzie».

Jana taksama adznačyła, što nie ŭpeŭnienaja, ci atrymaje piensiju: «Piensijny ŭzrost pavyšajecca, i ja jaho, chutčej za ŭsio, nie dačakajusia».

Pry hetym, padkreśliła majstar, dziaržava nie dapamahała joj startavać: «Kali ja pačynała svoj maleńki biźnies, dziaržava nie dapamahała zakuplać abstalavańnie i materyjały. Dyk moža chto patłumačyć — kamu i za što ja pavinna płacić?»

@manunyaslife Vy mienia koniečno iźvinitie , no rabotať na siebia užie sovsiem nie vyhodno . Nałohi, arienda, matieriały , tolko uśpievaj płatiť … #mastiermanikiura #global #načinajuŝijtiktokier ♬ sonido original - Trukos_danny

Što skazali ludzi ŭ kamientarach

Pad videa razharnułasia aktyŭnaja dyskusija, i mierkavańni padzialilisia.

Asnoŭnaja dumka tych, chto padtrymlivaje žančynu, u kamientarach była takoj:

prablema dla samazaniatych nie ŭ samich padatkach, a ŭ tym, što ŭ adkaz jany nie atrymlivajuć ničoha — ni harantyjaŭ, ni abarony, ni ŭpeŭnienaści ŭ budučyni.

• «A jašče padatak na ramont doma, jakoha nichto nie robić, padatki na mašynu, kvateru. Pakul my maŭčym — budziem ich karmić. Jany sabie naličvajuć vielizarnyja zarpłaty i jašče kraduć».
• «Hetym pytańniem zadajucca 97% biełarusaŭ! Dziaržava nikomu nie dapamahaje! Moža, sapraŭdy nadyšoŭ čas źmianić kiraŭnictva całkam?»
• «Za navučańnie płaciš sam, za materyjały płaciš sam, abstalavańnie kuplaješ za svaje — ale častku zaroblenyja hrošy ŭsio roŭna addavaj. Vielmi «sumlenna».
• «Ja ŭžo pryniała, što na piensiju raźličvać niama sensu. Tamu ciapier treba samoj nazapasić na staraść. U najm iści nie chočacca — dzie ja jašče doma, zajmajučysia lubimaj spravaj, zmahu zarablać stolki ž?».

Znajšlisia i tyja, chto z žančynaj nie pahadziŭsia.

• «Škoła, miedycyna i inšaje — dziaržava tracić na vas značna bolš, čym vy płacicie padatkaŭ».
• «Vy viedali, na što išli. Nie chočacie pracavać u najmie — značyć, niama i adpačynku, jaki apłačvaje pracadaŭca».

Kamientary da artykuła