Andreja Pačobuta pamianiali na łukašenkaŭskich špijonaŭ, aryštavanych u Polščy
Palitźniavoleny žurnalist vyjšaŭ na volu ŭ vyniku abmienu na špijonaŭ. Abmien, jaki ŭdałosia arhanizavać dziakujučy ŭdziełu 7 krain, prajšoŭ pa formule «piać na piać». Pačobuta na miažy sustrakaŭ premjer-ministr Polščy Donald Tusk.
Premjer-ministr Polščy Donald Tusk sustreŭ Pačobuta na miažy. «Sardečna zaprašajem u polski dom, siabar», — padpisaŭ jon fota ŭ tvitary
Andrej Pačobut — žurnalist z Hrodna, daŭni karespandent polskaha vydańnia Gazeta Wyborcza i člen «Sajuza palakaŭ Biełarusi». Za jaho vyzvaleńnie biełarusy i Polšča zmahalisia piać hadoŭ.
Jak piša BiełTA, na miažy Biełarusi i Polščy prajšoŭ abmien zatrymanymi pa formule «piać na piać».
«Toje, što adbyvajecca, źjaŭlajecca kulminacyjaj składanaha i praciahłaha pieramoŭnaha pracesu pamiž KDB Biełarusi i Ahienctvam raźviedki Polščy», — piša BiełTA.
Pavodle infarmacyi ahienctva, pieramovy pačalisia ŭ vieraśni 2025 hoda. «Adpraŭnym punktam da ich arhanizacyi pasłužyŭ zvarot da Alaksandra Łukašenki asobnych lidaraŭ družalubnych nam krain», — pieradaje Biełta słovy surazmoŭcy. Imavierna, majecca na ŭvazie zvarot ZŠA.
U abmienie, pavodle dziaržahienctva, udzielničali śpiecsłužby siami dziaržaŭ.
«Dziakujučy ŭzvažanaj pazicyi i nacelenaści bakoŭ na pošuk uzajemavyhadnych rašeńniaŭ, udałosia pieraadoleć roznahałośsi i dasiahnuć stanoŭčaha vyniku», — piša Biełta.
U vyniku apieracyi dziesiać hramadzian roznych krain byli vyzvaleny. Biełaruś i Rasija vyzvalili troch hramadzian Polščy i dvuch hramadzian Małdovy. Siarod hramadzian Polščy majecca na ŭvazie i Andrej Pačobut. Vyhladaje, u jaho dva hramadzianstvy, biełaruskaje i polskaje.
Uzamien ź Jeŭrasajuza pajechali piać hramadzian, «zatrymanych na terytoryi roznych krain ES i inšych dziaržaŭ». Heta hramadzianie Biełarusi, Rasii i inšych krain SND. U tym liku Polšča addała Rasii aryštavanaha archieołaha Alaksandra Buciahina. Jaho aryštoŭvali pa prośbie Ukrainy za raskopki ŭ Krymie.
Pavodle Biełta, Andreja Pačobuta vyzvalili na prośbu jaho maci i Anžaliki Borys.
Abmien Pačobuta adbyŭsia ŭ Biełaviežskaj puščy na piešachodna-viełasipiednym punkcie propusku Pieraroŭ — Biełavieža.
Pačobuta na voli vitaŭ premjer-ministr Polščy Donald Tusk. U rukach Pačobut trymaŭ biełaruski pašpart.
Raniej siońnia ŭ Varšavie adbyłasia sustreča ministra zamiežnych spraŭ Polščy Radasłava Sikorskaha i śpiecpradstaŭnika prezidenta ZŠA pa Biełarusi. «Važnyja spravy», — tak Sikorski prakamientavaŭ ich sustreču ŭ X.
«Maja kamanda i ja dapamahli damahčysia vyzvaleńnia troch hramadzian Polščy i dvuch hramadzian Małdovy. Hety histaryčny vynik staŭ mahčymy dziakujučy lidarstvu prezidenta Trampa, Krysu Śmitu i jaho kamandzie ŭ Dziarždepartamiencie, a taksama ciesnaj kaardynacyi ź niekalkimi nadziejnymi partniorami. My dziakujem Polščy, Małdovie i Rumynii za nieacennuju padtrymku ŭ hetych namahańniach, a taksama prezidentu Łukašenku za hatoŭnaść da kanstruktyŭnaha ŭzajemadziejańnia sa Złučanymi Štatami», — napisaŭ Koŭł u X.
Pačobut (sprava) z žurnalistam polskaj «Haziety Vyborčaj»
Pačobuta zatrymali 25 sakavika 2021 hoda ŭ Hrodnie. Siłaviki zładzili ŭ jaho doma doŭhi vobšuk, a potym pavieźli mužčynu ŭ minski Śledčy kamitet na dopyt i ŭ vyniku pakinuli na Vaładarcy.
Na jaho zaviali kryminałku pa č. 3 art. 130 KK (raspalvańnie varažniečy). U abvinavačvańni zhadali, što žurnalist u adnym sa svaich tekstaŭ nazyvaŭ ahresijaj napad SSSR na Polšču ŭ 1939 hodzie, taksama dadali da abvinavačvańnia jaho teksty pra biełaruskija pratesty, vykazvańni ŭ abaronu polskaj mienšaści ŭ Biełarusi i jaho artykuł ažno 2006 hoda pra adnaho z kiraŭnikoŭ polskaha antykamunistyčnaha padpolla ŭ Hrodzienskaj vobłaści. Paźniej dadali abvinavačvańnie pa č.3 art. 361 KK (zakliki da sankcyj).
U 2023‑m Pačobutu prysudzili 8 hadoŭ źniavoleńnia, jakija jon adbyvaŭ u navapołackaj kałonii №1.
Pačobut padčas suda. Fota: sb.by
Padčas terminu palitviazień pravioŭ jak minimum hod u PKT, pieražyŭ apieracyju na skury, pakutavaŭ na arytmiju i hipiertaniju.
Polskija palityki i dypłamaty šmat zmahalisia za toje, kab Pačobut vyjšaŭ na volu, u tym liku navat zakryvali pamiežny pierachod «Babroŭniki». Padčas źniavoleńnia Andreja ŭznaharodzili najvyšejšaj dziaržaŭnaj uznaharodaj Polščy — ordenam Biełaha arła. Taksama jamu prysudzili premiju Sacharava — Jeŭraparłamient daje jaje tym asobam, jakija zrabili vyklučny ŭniosak u baraćbu za pravy čałavieka.