Što Polšča i Biełaruś chočuć adzin ad adnaho pry vyzvaleńni Pačobuta? A Kanapackaja vyzvałasia stać paručycielem
Polski ŭrad ahučyŭ svaje prapanovy za vyzvaleńnie Pačobuta. Polšča moža znoŭ adkryć dadatkovyja pamiežnyja pierachody ź Biełaruśsiu, jakija byli začynienyja pry partyi «Prava i spraviadlivaść». Adnak Minsk pavinien vykanać niekalki ŭmoŭ. Čaho Polšča čakaje ad Alaksandra Łukašenki, piša Rzeczpospolita.
Pavodle krynic vydańnia ŭ polskim uradzie, polski bok čakaje spynieńnia praciahłaha mihracyjnaha kryzisu na miažy, vyzvaleńnia žurnalista i adnaho ź lidaraŭ polskaj mienšaści ŭ Biełarusi Andžeja Pačobuta, a taksama supracoŭnictva ŭ spravie vyznačeńnia vinavatych u zabojstvie polskaha sałdata, siaržanta Matevuša Siteka.
— Biełarusy viedajuć śpis našych pryjarytetaŭ, ale, na žal, ni ŭ adnoj z hetych śfier dahetul nie adbyłosia prahresu, — kaža surazmoŭca.
Vydańnie śćviardžaje, što na stale ŭ Łukašenki ŭžo lažyć prapanova Varšavy.
Kali ŭłady ŭ Minsku supakojać situacyju na miažy i vypuściać Andžeja Pačobuta, — buduć adkrytyja raniej zakrytyja pamiežnyja pierachody. U Minsku pra heta viedajuć, — kaža dobra prainfarmavany surazmoŭca. Inšych padrabiaznaściaŭ jon nie raskryvaje.
Jak miarkuje vydańnie, havorka idzie, vierahodna, pra pamiežny pierachod u Babroŭnikach (Bierastavica), zakryty ŭ 2023 hodzie z pryčyny prysudu Pačobutu ŭ vosiem hadoŭ.
Nie vyklučana, što tudy ŭvachodzić i adkryćcio pierachodu ŭ Kuźnicy (Bruzhi), jaki dahetul zastajecca zakrytym dla asabovaha i tavarnaha ruchu. Heta, biezumoŭna, palepšyła b handal Biełarusi ź ES, piša vydańnie.
Jak daviedałasia Rzeczpospolita, 25 vieraśnia, u dzień adkryćcia miažy, u Minsku sabrałasia kamisija, jakaja zajmajecca vyzvaleńniem palityčnych viaźniaŭ.
Z adpaviednaj prośbaj ab vyzvaleńni Andžeja Pačobuta da Łukašenki źviarnułasia niadaŭna kiraŭnica niepryznanaha ŭładami Sajuza palakaŭ Biełarusi Anžalika Borys, jakaja sama bolš za hod praviała za kratami. Joj dazvolili taksama sustrecca z žurnalistam u turmie, ale dalej sprava nie pajšła.
Ci razhladajecca prośba Borys u ciapierašni čas uradavaj kamisijaj?
— Nie maju prava vydavać padrabiaznaści, datyčnyja pracy kamisii, — adkazała na pytańnie Rzeczpospolita člen kamisii Hanna Kanapackaja.
— Ja padtrymlivaju inicyjatyvu Anžaliki Borys i hatova być paručalnikam u spravie vyzvaleńnia Andžeja Pačobuta, — kaža jana.
Kanapackaja śćviardžaje, što raniej jana była paručalnicaj vyzvalenaha ŭ listapadzie minułaha hoda Ryhora Kastusiova. Łukašenka vyzvaliŭ jaho z pryčyny ciažkaha stanu zdaroŭja i dazvoliŭ jamu zastacca ŭ Biełarusi.
Ci jość šaniec na chutkaje vyzvaleńnie Pačobuta, čyj stan zdaroŭja ŭžo doŭhi čas vyklikaje surjoznyja zaściarohi? Na heta pytańnie Kanapackaja nie adkazała.
Adna z krynic u polskim uradzie skazała vydańniu, što «nie chapaje ŭzajemnaha davieru pamiž Polščaj i Biełaruśsiu».
— Łukašenka heta zaciahvaje, a miž tym taki žest mała b što jamu kaštavaŭ, ale moh by stać dobraj asnovaj dla pieramovaŭ u budučyni, — kaža vydańniu surazmoŭcaŭ va ŭradzie. — Proźvišča Pačobuta viedajuć i amierykancy, jakija viaduć pieramovy z Łukašenkam ab vyzvaleńni čarhovych palityčnych viaźniaŭ, — dadaje jon.
Jon kaža, što Pačobut znachodzicca na čale «polskaha śpisu» asob, za čyjo vyzvaleńnie zmahajecca Varšava. U śpisie mohuć być navat niekalki dziasiatkaŭ proźviščaŭ, u tym liku asudžany na 11 hadoŭ łahieraŭ ksiondz Hienrych Akałatovič, ale taksama zatrymany niadaŭna 27‑hadovy polski karmielit Hžehaž Havieł.
Ciapier čytajuć
«Pieraapranuŭsia ŭ amapaŭca i dyryžyravaŭ čornaj dubinkaj». Adzin z zasnavalnikaŭ «Volnaha choru» — pra akcyi ŭ handlovych centrach u 2020‑m i pracu ŭ fiłarmonii ŭ Litvie
Kamientary