U Polščy zatrymali biełarusa, jaki hulaŭ kala čyhunki
Supracoŭniki Słužby achovy čyhunki i palicyi nočču z 14 na 15 śniežnia ŭ Hdańsku zatrymali 29‑hadovaha hramadzianina Biełarusi. Jaho načny špacyr palicyi padaŭsia padazronym. Śćviardžajecca, što mužčyna nielehalna znachodziŭsia ŭ Polščy. Spravaj zaniałosia Ahienctva ŭnutranaj biaśpieki (ABW).
Usio pačałosia z taho, što mašynist hruzavoha ciahnika zaŭvažyŭ padazronaha mužčynu, jaki stajaŭ kala słupa elektralinii na adnoj z čyhunačnych linij, piša Fakt.
Pra heta paviedamili dziažurnaj pa ruchu, jakaja pieradała spravu ŭ Rehijanalnuju kamiendaturu Słužby achovy čyhunki ŭ Hdańsku.
Na miesca nakiravali patrul u składzie supracoŭnikaŭ Słužby achovy čyhunki i palicyi. Jany znajšli mužčynu, jaki špacyravaŭ uzdoŭž rejek.
Jak vyśvietliłasia paźniej, zatrymany — 29‑hadovy hramadzianin Biełarusi. Jon śćviardžaŭ, što išoŭ pieššu pa puciach z hdańskaj Oruni ŭ centr horada. Ale viersija pra zvyčajnuju načnuju prahułku palicyi padałasia padazronaj, z ulikam surjoznych incydentaŭ na čyhuncy, jakija adbyvalisia ŭ Polščy hetaj vosieńniu.
Zatrymany mužčyna vyklikaŭ padazreńni ŭ słužbaŭ. Na miescy było ŭstanoŭlena, što jon znachodzicca ŭ Polščy nielehalna. U hetaj situacyi pravaachoŭniki paviedamili ŭ hdańskuju delehaturu Ahienctva ŭnutranaj biaśpieki (ABW), jakaja pieraniała dalejšyja dziejańni pa hetaj spravie.