U Minsku adkryŭsia restaran biełaruskaj kuchni z pamyłkaj u naźvie. Atrymałasia dvuchsensoŭna
U stalicy niedaloka ad stancyi mietro «Partyzanskaja» adkryŭsia restaran kłasičnaj biełaruskaj kuchni. Adnak miesca pryciahnuła ŭvahu nie stolki dranikami, kolki svajoj šyldaj: u biełaruskaj naźvie ŭstanovy hrubaja hramatyčnaja pamyłka, jakaja vyklikaje nieadnaznačnyja asacyjacyi.
Ułaśnik restarana pierad uvachodam. Fota: sacsietki restarana
Restaran adkryŭsia ŭ Zavodskim rajonie, na Partyzanskim praśpiekcie, 87. Miesca dobra znajomaje miascovym žycharam: raniej u hetym pamiaškańni doŭhi čas pracavała piceryja «Płanieta Pizza».
Hrubaja pamyłka i dvuchsensoŭny padtekst
Novy restaran atrymaŭ nazvu «Bieły huś», što z punktu hledžańnia normaŭ biełaruskaj movy źjaŭlajecca pamyłkaj. U biełaruskaj movie nazoŭnik «huś» zaŭsiody žanočaha rodu. Adpaviedna, pravilna nazva pavinna była b hučać jak «Biełaja huś». Samiec husi pa-biełarusku nazyvajecca «husak», a ŭžyvańnie słova «huś» u mužčynskim rodzie ŭłaścivaje vyklučna ruskaj movie.
Rekłama restarana, u naźvie jakoha — hrubaja pamyłka. Fota: sacsietki restarana
Takaja pamyłka vyhladaje asabliva pikantna ŭ sučasnym palityčnym kantekście. Paśla 2020 hoda biełaruskija siłaviki i prarasijskija aktyvisty pačali ŭžyvać frazu «žuje bieły huś» jak ździeklivaje pierakručvańnie patryjatyčnaha łozunha «Žyvie Biełaruś». Ci źjaŭlajecca heta śviadomaj pravakacyjaj ci ž usiaho tolki supadzieńnie praz pamyłku — zastajecca tolki zdahadvacca.
Biełaruskaja kuchnia pa-rusku
Niahledziačy na toje, što ŭstanova pazicyjanuje siabie jak restaran rodnaj kuchni, znajści ŭ im biełaruskuju movu amal niemahčyma. Sacyjalnyja sietki ŭstanovy viaducca vyklučna pa-rusku, mieniu taksama składziena pa-rusku.
U restaranie biełaruskaj kuchni ŭsio aformlena pa-rusku. Fota: sacsietki restarana
U mieniu restarana prapanujecca sumieś kłasičnych biełaruskich straŭ — takich jak draniki, mačanka i kałduny — i savieckaj dy jeŭrapiejskaj kuchni: aliŭje, sieladziec pad šubaj i zapiečanyja ślimaki.
Biełaruskija stravy ŭ restaranie. Fota: sacsietki restarana
Ceny ŭ restaranie siarednija:
- Draniki sa śmiatanaj — 13 rubloŭ.
- Mačanka ź blinami ci dranikami — 24 rubli.
- Kałduny ź miasam — 18 rubloŭ.
- Sudak z hrucaj — 28 rubloŭ.
- «Panski boršč» — 17 rubloŭ.
Siarod najbolš darahich pazicyj, naprykład, halonka ŭ pivie za 42 rubli ci «Set 6 sotak» (nastojki z zakuskaj) za 55 rubloŭ.
Interjer jak «hniazdo»
Afarmleńnie restarana. Fota: sacsietki restarana
Afarmleńnie restarana. Fota: sacsietki restarana
Što tyčycca afarmleńnia, to stvaralniki pasprabavali zrabić staŭku na ŭtulnaść i kazačnaść. Interjer stylizavany pad sielskuju chatu ci navat «hniazdo»: fakturnyja lapnyja ścieny, vialikija puchnatyja śviacilni ručnoj pracy, maleńkija lampy ŭ vyhladzie pałavinak jajek i štučny kamin.
Ustanova raźličana prykładna na 60 pasadačnych miescaŭ i znachodzicca ŭ rajonie, jaki sapraŭdy nie pieranasyčany miescami dla adpačynku.