Što za preparat dla pachudzieńnia chacieŭ Łukašenka ad amierykancaŭ?

Pa infarmacyi vydańnia The Wall Street Journal, pasłańnik Trampa Džon Koŭł prapanavaŭ Łukašenku srodak dla pachudzieńnia pad nazvaj Zepbound. Raskazvajem, što heta za preparat.

Fota: pres-słužba Pucina

Preparat Zepbound adnosicca da najnoŭšaha pakaleńnia recepturnych srodkaŭ dla doŭhaterminovaha kantrolu vahi. Jaho vytvorca — bujnaja amierykanskaja farmaceŭtyčnaja karparacyja Eli Lilly. Šyrokaja aŭdytoryja bolš čuła pra «Aziempik», ale Zepbound časta ŭsprymajecca jak bolš sučasny i ŭ mnohich vypadkach bolš efiektyŭny srodak dla pachudzieńnia, pakolki ŭ daśledavańniach jon demanstravaŭ vielmi značnyja vyniki pa źnižeńni masy cieła.

Asnoŭnaje dziejučaje rečyva Zepbound — tyrziepatyd (tirzepatide). Admietnaść hetaha rečyva ŭ tym, što jano ŭździejničaje adrazu na dva typy receptaraŭ, źviazanych z rehulacyjaj apietytu i abmienu rečyvaŭ: hlukahonapadobnaha pieptydu-1 (GLP-1) i hlukozazaležnaha insulinatropnaha polipieptydu (GIP).

Fota: dailymed.nlm.nih.gov

Takaja padvojnaja schiema dziejańnia dapamahaje źnižać pačućcio hoładu, uzmacniać adčuvańnie nasyčeńnia, zapavolvać aparažnieńnie straŭnika i ŭ vyniku pamianšać kolkaść kałoryj, jakija čałaviek spažyvaje. Adnačasova preparat moža palapšać pakazčyki, źviazanyja z kantrolem cukru ŭ kryvi, — heta adna z pryčyn, čamu takija leki pačynali jak srodki dla ludziej z dyjabietam, ale chutka stali klučavymi i ŭ temie baraćby z atłuścieńniem.

Jak užyvać

Preparat vypuskajecca ŭ formie adnarazovych injekcyjnych ručak (aŭtainjektaraŭ) dla padskurnaha ŭviadzieńnia. Injekcyju pacyjent robić samastojna adzin raz na tydzień — u rajonie žyvata, ściahna abo vierchniaj častki ruki.

Lačeńnie zaŭsiody pačynajecca ź minimalnaj dozy 2,5 milihrama, kab arhanizm moh adaptavacca i kab źnizić vierahodnaść niepryjemnych pabočnych efiektaŭ, najpierš źviazanych sa stravavańniem. Dalej doza pavialičvajecca pastupova — zvyčajna ź intervałami nie mienš za čatyry tydni — pakul nie dasiahnie padtrymlivajučaha ŭzroŭniu. Jon moža vahacca ŭ zaležnaści ad pieranosnaści i efiektu, ale maksimalnaja doza składaje 15 milihramaŭ na tydzień.

Važna razumieć, što Zepbound nie źjaŭlajecca karotkaterminovym srodkam. Jon pryznačany dla chraničnaha kantrolu vahi, i na praktycy lačeńnie moža ciahnucca miesiacy i hady. Daśledavańni i nazirańni pakazvajuć, što paśla spynieńnia takich injekcyj vaha časta moža viartacca, tamu praciahłaść terapii vyznačajecca indyvidualna i ŭ značnaj stupieni zaležyć ad taho, nakolki čałaviek zdolny ŭtrymlivać vynik biez farmakałahičnaj padtrymki. Dastupnaść hetaha srodku abmiežavanaja nie tolki recepturnym statusam, ale i vysokim koštam.

U Złučanych Štatach aficyjny aryjencirovačny košt miesiačnaha kursa moža pieravyšać tysiaču dalaraŭ.

Pabočnyja efiekty

Adnak za vysokaj efiektyŭnaściu chavajucca i ryzyki. Instrukcyja Zepbound papiaredžvaje pra šyroki śpiektr pabočnych efiektaŭ. Kliničnyja vyprabavańni pakazali, što pieravažnaja bolšaść pacyjentaŭ sutykajecca z reakcyjaj straŭnikava-kišačnaha traktu.

Samaj častaj skarhaj źjaŭlajecca młosnaść, jakuju adčuvajuć ad 25% da 29% pacyjentaŭ u zaležnaści ad daziroŭki (suprać 8% u hrupie płaceba). Taksama časta ŭ pacyjentaŭ nazirajucca dyjareja (19—23%) i rvota (8—13%).

Akramia hetaha, niekatoryja sutykajucca z prablemami ŭ pracy kišačnika, takimi jak zapory (11—17%) i pavyšanaje hazaŭtvareńnie, ci mietearyzm (3—4%). Pacyjenty mohuć adčuvać rezi i boli ŭ žyvacie (9—10%), ahulnaje parušeńnie stravavańnia ci dyspepsiju (9—10%), a taksama pakutavać ad pastajannaj adryžki (4—5%). U niekatorych vypadkach nazirajecca ŭzdućcie žyvata (3—4%).

Akramia stravavalnaj sistemy, Zepbound moža ŭpłyvać na ahulny stan i źniešnaść. Tak, ad 5% da 7% udzielnikaŭ daśledavańniaŭ paviedamlali pra mocnuju stomlenaść, a ŭ 4—5% vypadkaŭ było zafiksavana vypadzieńnie vałasoŭ. Taksama mahčymyja reakcyi ŭ miescy ŭkołu, takija jak pačyrvanieńnie ci śvierb (6—8%), hałavakružeńnie (4—5%) i nievialikaje źnižeńnie arteryjalnaha cisku (1—2%).

Supraćpakazańni

Bolš niebiaśpiečnyja ŭskładnieńni ŭklučajuć ryzyku pankreatytu i prablemy z žoŭcievym puzyrom — asabliva na fonie chutkaha pachudzieńnia. Akramia taho, isnujuć surjoznyja pieraściarohi adnosna ščytapadobnaj załozy: u daśledavańniach na žyviołach było zafiksavana pavieličeńnie ryzyki puchlin S-kletak ščytapadobnaj załozy.

Tamu preparat supraćpakazany ludziam, u jakich u asabistaj abo siamiejnaj historyi byŭ miedularny rak ščytapadobnaj załozy, a taksama tym, chto maje sindrom množnych endakrynnych nieapłazij 2 typu (MEN-2). Heta adzin z klučavych punktaŭ biaśpieki, jaki patrabuje ad pacyjentaŭ i lekaraŭ asablivaj uvažlivaści.

Takim čynam, preparat, jaki ŭ publičnaj historyi staŭ svojeasablivym «mostam» u niefarmalnaj kamunikacyi pamiž Koŭłam i Łukašenkam, u realnaści źjaŭlajecca surjoznym miedycynskim srodkam. Jon moža davać značny efiekt u źnižeńni vahi, ale patrabuje nie tolki vialikich hrošaj, ale i adkaznaha vykarystańnia pad nahladam śpiecyjalistaŭ.

Kamientary da artykuła