U «Aziempika» źjaviŭsia surjozny kankurent. Amierykancy ŭžo čaściej kuplajuć mienavita hety preparat dla pachudzieńnia

Dackaja farmaceŭtyčnaja kampanija Novo Nordisk pieršaj vyjšła na rynak ź injekcyjnym preparatam dla lačeńnia dyjabietu, i ŭ chutkim časie nazva «Aziempik» stała sinonimam novaha kłasa papularnych preparataŭ dla pachudzieńnia.

Ale kankurencyja pačała dahaniać, novyja vyprabavańni lekaŭ rasčaravali, akcyi kampanii ŭpali, a ŭ mai 2025 hoda jaje hienieralny dyrektar pakinuŭ pasadu. Na hetym tydni akcyi kampanii ŭpali bolš čym na 60 miljardaŭ jeŭra paśla taho, jak jana apublikavała prahnoz ab źnižeńni prodažaŭ i prybytku.

Jak piša The Financial Times, asnoŭnym faktaram zaniapadu ličycca imklivy rost Eli Lilly, amierykanskaha kankurenta, jakomu ŭdałosia vypuścić bolš efiektyŭnyja preparaty — Mounjaro i Zepbound. Kliničnyja daśledavańni pakazali, što hetyja srodki zabiaśpiečvajuć bolšaje źnižeńnie vahi (21% u Mounjaro suprać 16% u Wegovy) i majuć mienš pabočnych efiektaŭ.

U lipieni 2025 hoda, pavodle danych analityčnaj kampanii IQVIA, u ZŠA kolkaść receptaŭ na Mounjaro ad Eli Lilly skłała 622 000 u tydzień, pierasiahnuŭšy Ozempic ad Novo Nordisk (607 000). Taksama Zepbound abyšoŭ Wegovy pa kolkaści receptaŭ. Upieršyniu dola rynku Ozempic u hetaj katehoryi lekaŭ upała nižej za 50%, što stała važnym psichałahičnym i rynkavym rubiažom dla Novo Nordisk.

Analityk Emili Fiłd z Barclays nazyvaje padzieńnie doli rynku Novo Nordisk «pavolnaj aŭtakatastrofaj», bo Eli Lilly nie tolki zachapiła lidarstva ŭ prodažach, ale i apiaredziła ŭ raspracoŭcy novych lekaŭ.

Pavialičyć

Pamyłki stratehii i markietynhu

Jašče adna pryčyna ŭ tym, što Novo Nordisk nie była hatovaja da maštabaŭ popytu. Kampanija abapirałasia na prahnozy prodažaŭ, zasnavanyja na mienš efiektyŭnym preparacie Saxenda, i nie zmahła svoječasova pavialičyć vytvorčaść svaich novych chitoŭ, što pryviało da deficytu i straty častki rynku.

Kali pacyjenty i lekary sutykalisia ź niedachopam Ozempic i Wegovy, jany pierachodzili na pradukty Eli Lilly abo dastupnyja repliki. Choć Novo Nordisk paźniej nabyła zavody Catalent dla pavieličeńnia vytvorčaści, rańniaja pamyłka ŭ prahnazavańni popytu mieła praciahłyja nastupstvy. U toj ža čas Eli Lilly chutčej vyrašyła svaje prablemy z pastaŭkami.

Novo Nordisk spaźniłasia i z razumieńniem novaj dynamiki rynku, dzie spažyŭcy ŭsio čaściej hatovy abminać strachavańnie i kuplać preparaty samastojna. Jana aryjentavałasia na prodaž insulinavych srodkaŭ praz daktaroŭ, a nie na pramuju pracu z pacyjentami i miedyjny markietynh.

Eli Lilly, naadvarot, chutka zrazumieła hetuju dynamiku i zapuściła płatformu LillyDirect u studzieni 2024 hoda dla pramych prodažaŭ pacyjentam pa dastupnych cenach. Novo Nordisk, u svaju čarhu, adreahavała tolki ŭ sakaviku z anałahičnaj płatformaj NovoCare.

Kulturny faktar i niaŭdača novaj raspracoŭki

Kulturny faktar taksama adyhraŭ svaju rolu. Pavodle analityka BMO Capital Markets Evana Siejhiermana, Eli Lilly jak amierykanskaja kampanija lepš razumieła tonkaści rynku ZŠA. U toj čas jak Novo Nordisk sprabavała adnačasova vychodzić na roznyja mižnarodnyja rynki, Eli Lilly skancentravałasia na aptymizacyi ŭ ZŠA.

U śniežni 2024 hoda akcyi Novo Nordisk rezka ŭpali paśla taho, jak kampanija apublikavała vyniki vyprabavańniaŭ svajho novaha injekcyjnaha preparata dla pachudzieńnia CagriSema.

Analityki abvinavacili kampaniju ŭ praźmiernaj samaŭpeŭnienaści: jana abiacała siaredniaje źnižeńnie vahi na 25%, ale nie papiaredziła, što pacyjenty mahli samastojna rehulavać dozu, što paŭpłyvała na efiektyŭnaść. U vyniku ŭdzielniki vyprabavańniaŭ stracili ŭ siarednim 23% vahi.

Adnak, jak zaŭvažajuć ekśpierty, navat z ulikam prablem rynak zastajecca hihanckim: bolš za miljard čałaviek va ŭsim śviecie pakutujuć ad zališniaj vahi. Heta daje šaniec na adnaŭleńnie. Unutry kampanii jość razumieńnie, što patrebna pieraaryjentacyja na spažyŭca, i niekatoryja krynicy kažuć pra entuzijazm u pošuku novaj stratehii.

Adnak z ulikam kankurencyi nie tolki z boku Eli Lilly, ale i takich vytvorcaŭ, jak Roche, Amgen, AstraZeneca, dackaj farmaceŭtyčnaj kampanii Novo Nordisk daviadziecca dziejničać chutčej, śmialej i bolš hnutka, kab viarnuć stračanaje lidarstva.

• 6
• 0
• 0
• 1
• 1
• 0
• 0
• 0