Zialenski anansavaŭ novuju sustreču delehacyj ZŠA i Ukrainy

Zialenski zajaviŭ, što vysoka cenić prahres, jakoha dasiahnuli delehacyi Ukrainy i ZŠA na praciahu apošnich tydniaŭ.

Fota: telehram prezidenta Uładzimira Zialenskaha

Paśla pieramovaŭ i pres-kanfierencyi ŭ ZŠA z kiraŭnikom Biełaha doma Donaldam Trampam prezident Ukrainy Uładzimir Zialenski paviedamiŭ u svaim telehram-kanale pra damoŭlenaść nakont nastupnaj sustrečy delehacyj Ukrainy i ZŠA.

Zialenski jašče raz vykazaŭ padziaku Donaldu Trampu za «cudoŭnuju sustreču». Pavodle jaho słoŭ, jany praviali źmiastoŭnuju razmovu pa ŭsich pytańniach.

«Vysoka cenim prahres, jakoha dasiahnuli ŭkrainskaja i amierykanskaja kamandy na praciahu apošnich tydniaŭ», — adznačyŭ Zialenski. Asobna jon padziakavaŭ Styvu Uitkafu i Džaredu Kušnieru za ich udzieł i poŭnuju addanaść spravie, a taksama adznačyŭ pracu ŭkrainskich pradstaŭnikoŭ, u pryvatnaści Rustema Umierava i Andreja Hnatava.

Pavodle słoŭ prezidenta Ukrainy, byli abmierkavanyja ŭsie aśpiekty mirnaj ramki i dasiahnutyja značnyja vyniki. Akramia taho, Zialenski i Tramp abmierkavali paśladoŭnaść dalejšych dziejańniaŭ.

Pavodle Zialenskaha, harantyi biaśpieki źjaŭlajucca klučavymi na šlachu da dasiahnieńnia tryvałaha miru.

«Damovilisia, što našy kamandy sustrenucca ŭžo na nastupnym tydni, kab finalizavać usie abmierkavanyja pytańni», — dadaŭ prezident Ukrainy.

Kamientary da artykuła