Litva rychtuje masty na miažy ź Biełaruśsiu i Rasijaj da padryvu ŭ vypadku napadu
Na mastach pablizu litoŭska-biełaruskaj miažy pačalisia maštabnyja inžyniernyja raboty. Uzbrojenyja siły Litvy paviedamili vydańniu LRT, što heta častka stratehičnaha płana pa ŭmacavańni Bałtyjskaj linii abarony.
Hałoŭnaja meta hetych rabot — padrychtoŭka transpartnaj infrastruktury da chutkaha źniščeńnia ŭ vypadku vajennaj pahrozy.
Na mastach ustaloŭvajuć śpiecyjalnyja kanstrukcyi, pryznačanyja dla apieratyŭnaha macavańnia vybuchoŭki. Vajskoŭcy vybirajuć abjekty, zychodziačy z reljefu miascovaści i ich značnaści dla abarony krainy.
Akramia padrychtoŭki mastoŭ da padryvu, litoŭski bok realizuje i inšyja miery biaśpieki. Stvorany dziasiatki placovak dla zachoŭvańnia supraćtankavych vožykaŭ i inšych pieraškod. Na stratehičnych darohach vysadžvajuć lasnyja pałosy dla maskiroŭki i abarony. Pahłyblajucca iryhacyjnyja ravy, jakija mohuć vykonvać rolu akopaŭ abo supraćtankavych ravoŭ.
Takim čynam Litva paśladoŭna pieratvaraje prymiežnuju infrastrukturu ŭ sistemu abarony, zdolnuju maksimalna zapavolić ruch patencyjnaha praciŭnika.