Tramp zładziŭ raskošnuju navahodniuju viečarynu i pažadaŭ «miru na Ziamli»
Siarod šmatlikich haściej byŭ premjer-ministr Izraila Bińjamin Nietańjachu.
Prezident Donald Tramp i pieršaja łedzi Miełani Tramp prybyvajuć na śviatkavańnie Novaha hoda ŭ svoj kłub Mar-a-Łaha, 31 śniežnia 2025 hoda, u Pałm-Bič, štat Fłaryda. Fota: AP Photo/Alex Brandon
Prezident ZŠA Donald Tramp zładziŭ raskošnuju navahodniuju viečarynu ŭ svajoj siadzibie Mar-a-Łaha ŭ Fłarydzie. Jon byŭ u smokinhu, a pieršaja łedzi ZŠA Miełanija ŭ aślaplalnaj siarebranaj sukiency. Tramp adkazaŭ na paru pytańniaŭ žurnalistaŭ, pierš čym adpravicca na śviatkavańnie.
Płany na 2026 hod jon akreśliŭ koratka — «mir na Ziamli».
Unutry pierapoŭnienaj zały Tramp skazaŭ haściam, što kraina «adčuvaje siabie vydatna», piša The New York Post.
«My viarnulisia. My mocnyja», — adznačyŭ Tramp.
Siarod šmatlikich haściej byŭ premjer-ministr Izraila Bińjamin Nietańjachu, jaki sustrakaŭsia z Trampam za niekalki dzion da hetaha, kab abmierkavać status pahadnieńnia ab spynieńni ahniu ŭ Hazie.
Taksama byli zaŭvažanyja starejšyja syny prezidenta, Donald Tramp-małodšy i Eryk Tramp, jaho niaviestka Łara Tramp. Byli niekalki čynoŭnikaŭ administracyi Trampa, a jašče emiracki miljarder Chusiejn Sadžvani, jaki paabiacaŭ inviestavać 20 miljardaŭ dalaraŭ u amierykanskija data-centry.
Prezident Donald Tramp pradaje na aŭkcyjonie karcinu mastački Vanesy Arabueny padčas śviatkavańnia Novaha hoda ŭ svaim kłubie ŭ Mar-a-Łaha, 31 śniežnia 2025 hoda, u Pałm-Bič, štat Fłaryda. Fota: AP Photo/Alex Brandon
Na navahodnim hała-kancercie Trampa vystupiła chryścijanskaja mastačka Vaniesa Arabuena, jakaja prosta na scenie napisała partret Jezusa Chrysta. Karcinu pradali na dabračynnym aŭkcyjonie za 2,5 miljona dalaraŭ — hrošy pojduć miascovamu departamientu šeryfa i dziciačaj daśledčaj balnicy Sient-Džud.