Mocnyja śniehapady paralizavali Jeŭropu — zatory, admieny rejsaŭ i ciahnikoŭ, zakryćcio škoł
U apošnija dni Jeŭropa zmahajecca z surovymi zimovymi ŭmovami nadvorja.
Kala aeraporta ŭ Raterdamie. Fota: Mouneb Taim / NurPhoto via Getty Images
Ekstremalna nizkija tempieratury i mocnyja śniehapady pryviali da admieny avijarejsaŭ i ciahnikoŭ, utvareńnia zatoraŭ na darohach, a taksama zakryćcia škoł u mnohich krainach, piša Bild.
Asabliva mocna paciarpieli Niderłandy: z-za nadvorja i techničnych niaspraŭnaściaŭ čyhunačnaje złučeńnie było amal całkam paralizavanaje. U amsterdamskim aeraporcie Schipchoł — važnym mižnarodnym transpartnym vuźle — učora daviałosia admianić amal 700 rejsaŭ, što składaje bolš za pałovu z pryblizna 1200 zapłanavanych uźlotaŭ i pasadak.
U paryžskich aeraportach Šarl-de-Hol i Arli avijakampanii byli vymušanyja admianić 15 % svaich rejsaŭ. U Vialikabrytanii taksama admianiali rejsy ŭ niekalkich aeraportach.
Francyju achapili zatory ahulnaj praciahłaściu kala 1000 kiłamietraŭ — u Narmandyi, Bretani i vakoł Paryža. U Narmandyi ŭ vyniku DTZ, źviazanych ź niespryjalnymi ŭmovami nadvorja, zahinuli jak minimum piać čałaviek.
Śnieh i maroz zapavolili ruch i vysakachutkasnych ciahnikoŭ: francuzski TGV byŭ vymušany źnizić chutkaść z 300 da 200 km/h. U Paryžy było prypyniena aŭtobusnaje złučeńnie, a taksama ruch na niekatorych tramvajnych linijach.
U Vialikabrytanii byli začynienyja sotni škoł: tolki ŭ Paŭnočnaj Irłandyi, pavodle danych uładaŭ, spynili pracu 212 ustanoŭ. Anhlija, Šatłandyja i Uels taksama paciarpieli ad masavaha zakryćcia navučalnych ustanoŭ.
Akramia taho, kampanija Eurostar, čyje ciahniki złučajuć Vialikabrytaniju z macierykovaj Jeŭropaj, paraiła pasažyram na maršrutach pamiž Łondanam i Niderłandami adkłaści pajezdki. Z-za drennych umoŭ nadvorja ŭ Niderłandach ciahniki mahli kursiravać tolki da Brusiela.
Navat na Balearskich astravach u Ispanii naziraŭsia mocny śniehapad: na Majorcy i ŭ bolšaści inšych rehijonaŭ ułady abviaścili treci pa ŭzroŭni niebiaśpieki — žoŭty — uzrovień tryvohi.
Polskaja čyhunka taksama paviedamili pra šmathadzinnyja zatrymki i admieny ciahnikoŭ z-za mocnych śniehapadaŭ. Pra admieny rejsaŭ paviedamlałasia i ŭ aeraportach Bośnii i Hiercahaviny, a taksama Šviecyi.