Zatrymanaha ŭ Francyi rasijskaha baskietbalista abmianiali na asudžanaha ŭ Rasii francuza
Rasijskaha baskietbalista Daniiła Kasatkina abmianiali na francuza Łarana Vinaćje, jakoha padazrajuć u špijanažy, paviedamiła FSB Rasii.
Daniił Kasatkin
Daniiła Kasatkina, jaki hulaŭ za maskoŭski baskietbolny kłub MBA-MAI, zatrymali 21 červienia 2025 hoda ŭ paryžskim aeraporcie Šarl de Hol pa zapycie ZŠA. Jaho padazravali va ŭdziele ŭ chakierskaj hrupie, jakaja pravodziła ataki z dapamohaj prahram-vymahalnikaŭ.
Pavodle amierykanskich uładaŭ, sietka, ź jakoj źviazvajuć baskietbalista, uzłamała kala 900 kampanij, u tym liku dva fiederalnyja viedamstvy ZŠA. Sam baskietbalist svaju vinu nie pryznavaŭ.
U kastryčniku francuzski sud vyrašyŭ vydać Kasatkina ZŠA, adnak premjer-ministr Francyi Siebaśćian Lekarniu nie padpisaŭ pastanovu ab ekstradycyi.
Łaran Vinaćje za kratami
Palitołaha Łarana Vinaćje zatrymali ŭ Maskvie ŭ červieni 2024 hoda, kali jon pracavaŭ u šviejcarskim Centry humanitarnaha dyjałohu. U kastryčniku taho ž hoda jaho asudzili na try hady kałonii za ŭchileńnie ad abaviazkaŭ «zamiežnaha ahienta». U žniŭni 2025 hoda stała viadoma, što suprać francuza taksama raspačali spravu ab špijanažy.
U śniežni na štohadovaj pramoj linii žurnalist francuzskaha telekanała TF1 spytaŭ Uładzimira Pucina pra los Vinaćje. U adkaz Pucin zajaviŭ, što ŭpieršyniu čuje pra hetu spravu. Paźniej pres-sakratar Kramla Dźmitryj Piaskoŭ paviedamiŭ, što Maskva zrabiła Paryžu «prapanovu».