Biełastok na vušach praź źniknieńnie aktyvista Vajciachoŭskaha, susieda pamierłaha špijona Usiera. A toj ciškom viarnuŭsia ŭ Biełaruś
Zasnavalnik kolišniaj baranavickaj haziety «Šah» Anatol Vajciachoŭski razam z Usieram zdymalisia dla prapahandysckaha filma «Čužoje nieba». Havaryli, što ich padmanuli.
Aktyvisty Biełastoka zabili tryvohu: źnik pradprymalnik i zasnavalnik papularnaj u 1990‑ia baranavickaj haziety «Šah» Anatol Vajciachoŭski, jaki paśla pratestaŭ 2020 hoda vyjechaŭ u emihracyju.
Miascovyja zaŭvažyli, što mužčyna pierastaŭ źjaŭlacca na pracy ŭ taksi paśla taho, jak pamior jaho eks-susied pa kvatery Uładzimir Usier. Nahadajem, toj znachodziŭsia ŭ Polščy pad śledstvam pa spravie ab špijanažy.
Adnak, jak stała viadoma «Našaj Nivie», pakul u Biełastoku panična šukali Anatola Vajciachoŭskaha, ujaŭlajučy samyja roznyja viersii źniknieńnia, jon znajšoŭsia ŭ Biełarusi.
U listapadzie 2025‑ha ŭ biełastockuju kvateru, dzie Vajciachoŭski žyŭ razam z 69‑hadovym babrujčaninam Uładzimiram Usieram (Łazaravym) uvarvalisia vosiem čałaviek sa zbrojaj i ŭ broniekamizelkach — heta byli polskija śpiecsłužby. U kvatery praviali pieratrus, a Łazarava zabrali pa padazreńni ŭ špijanažy. Adnak nieŭzabavie jon pamior: spyniłasia serca.
Da špijanažnaj historyi abodva susiedy ŭlapalisia ŭ prapahandyscki film BT. Pa zamovie prapahandystaŭ, jakija nazvalisia aktyvistami ź Vilni, jakija chočuć dapamahčy ź finansavańniem tym, kamu ciažka ŭ emihracyi, Vajciachoŭski i Usier zapisali videa, u jakim raskazali pra ŭsie minusy žyćcia ŭ zamiežžy.
Anatol Vajciachoŭski tady śćviardžaŭ, što trapiŭ u film «Čužoje nieba» pamyłkova, bo davieryŭsia susiedu. Abodva zarabili na filmie pa 50 jeŭra.
Biełastockija aktyvisty raspaviali, što Vajciachoŭski niečakana źnik kala miesiaca tamu (praz sutki paśla taho, jak Usier pamior u šełtary). Anatol vydaliŭ svoj profil u telehramie, vyklučyŭ telefon i pierastaŭ vychodzić na pracu ŭ taksi.
Pasprabavali datelefanavacca da žonki Anatola Taćciany, jakaja praciahvała žyć u Biełarusi. Padčas razmovy žančyna viała siabie padazrona: niaŭpeŭniena pramoviła, što z Anatolem jany daŭno ŭ razvodzie i jana ničoha pra jaho los nie viedaje. Pry hetym u jaje instahramie było mnostva fota i videa z vodpusku z mužam, jakija datavalisia 2025 hodam. Paśla hetaha zvanok pierarvaŭsia, i ŭžo nastupnym razam słuchaŭku padniaŭ sam Anatol, jaki paśpieŭ raspavieści, što jon «adpačyvaje ŭ svajakoŭ». Na pytańnie ž, čamu jon źjechaŭ z Polščy i ci płanuje viartacca, mužčyna kinuŭ trubku.
Da paślavybarčych pratestaŭ 2020 hoda mužčyna ź siamjoj žyŭ u Baranavičach, peŭny čas pracavaŭ na rajonnym vuźle elektrasuviazi. U siaredzinie 1990‑ch Vajciachoŭski staŭ adnym z zasnavalnikaŭ miascovaj haziety «Šah». Heta adna ź pieršych pryvatnych haziet horada i niekali adna z samych papularnych, jaje nakład siahaŭ 11 tysiač ekzemplaraŭ. Paźniej jana pierafarmatavałasia ŭ čysta rekłamnuju. U pačatku 2000‑ch Vajciachoŭski syšoŭ z žurnalistyki, staŭ pradprymalnikam. Jon zajmaŭsia miedycynaj i tavarami dla zdaroŭja.
U 2023 hodzie Vajciachoŭskaha zatrymaŭ HUBAZiK — za toje, što Anatol pakidaŭ u telehramie kamientaryi suprać rasijskaha ŭvarvańnia va Ukrainu i hvałtu siłavikoŭ, ale kali jaho vypuścili, jon apieratyŭna evakujavaŭsia za miažu pry dapamozie «Bajsoła».
Kamientary
Tak i dadajcie ŭ admysłovuju bazu.
Mahčyma i Łazaraŭ nie svajoj śmierciu pamior.