Žonka palitviaźnia napisała, što jaje muža jašče nie vyzvalili. Džon Koŭł joj adkazaŭ
Śpiecpradstaŭnik prezidenta ZŠA letaś niekalki razoŭ byvaŭ u Minsku ź vizitam da Łukašenki.
Džon Koŭł. Fota: Yauhen Yerchak Anadolu via Getty Images
Žonka palitviaźnia, jakaja žyvie ŭ Varšavie (poŭnaje imia jaje nie paznačana), źviarnułasia ŭ tvitary da śpiecyjalnaha pradstaŭnika prezidenta ZŠA Džona Koŭła.
«Ja biełaruska. Ja žonka palitviaźnia. U nas maleńkija dzieci. Majho muža jašče nie vyzvalili, ale ŭ mianie jość nadzieja, i ja dabrasłaŭlaju vas, mister Džon Koŭł».
Toj adkazaŭ žančynie: «Pracuju nad hetym».
Nahadajem, u 2025 hodzie ŭ vyniku vizitaŭ amierykanskaj delehacyi ŭ Biełaruś na čale z Koŭłam byli vyzvaleny try hrupy palitviaźniaŭ. Pieršuju (14 čałaviek) vypuścili 21 červienia — siarod ich byli Siarhiej Cichanoŭski i Natalla Dulina. Usich vyvieźli ŭ Litvu. Hetym ža maršrutam 11 vieraśnia vyvieźli 51 palitviaźnia (u hetaj hrupie byli Ihar Łosik, Źmicier Daškievič) — 52‑m pavinien byŭ stać Mikoła Statkievič, ale jon vyłamaŭ dźviery aŭtobusa i viarnuŭsia ŭ Biełaruś.
Apošniuju na hety momant hrupu (123 čałavieki) vyzvalili 13 śniežnia — bolšaść niečakana departavali va Ukrainu (u tym liku Maryju Kaleśnikavu, Viktara Babaryku, Paŭła Sieviarynca, Maksima Znaka, Alaksandra Fiadutu), jašče niekalki čałaviek (razam z Alesiem Bialackim) — u Litvu.