Rasija i Ukraina damovilisia pra łakalnaje pieramirje kala Zaparožskaj AES

Mižnarodnaje ahienctva pa atamnaj enierhietycy (MAHATE) paviedamiła, što Rasija i Ukraina pahadzilisia na abmiežavanaje łakalnaje spynieńnie ahniu kala Zaparožskaj atamnaj elektrastancyi. Heta nieabchodna, kab adramantavać apošniuju reziervovuju liniju elektrazabieśpiačeńnia stancyi, zajaviŭ hienieralny dyrektar ahienctva Rafael Hrosi.

Zaparožskaja AES. Fota: Wikimedia Commons

Reziervovaja linija napružańniem 330 kV była paškodžanaja 2 studzienia padčas bajavych dziejańniaŭ. Z taho času Zaparožskaja AES pracuje tolki za košt asnoŭnaj linii 750 kV. Ukrainskija enierhietyki płanujuć pačać ramont u najbližejšy čas, a misija MAHATE ŭžo nakiravałasia ŭ pryfrantavuju zonu, kab nazirać za pracesam.

Na samoj Zaparožskaj stancyi śpiecyjalisty pravieryli padrychtavanaść da zimy: sistemy abarony ad zamiarzańnia vady ŭ basiejnach z adpracavanym palivam i dyziel-hienieratary znachodziacca ŭ spraŭnym stanie. Manitorynh situacyi praciahvajecca.

MAHATE taksama adznačaje, što za apošni tydzień va Ukrainie adbyłosia niekalki vypadkaŭ, kali vajennyja dziejańni niehatyŭna paŭpłyvali na pracu atamnych stancyj. Adna ź dziejnych AES navat była vymušanaja časova źmienšyć vytvorčaść elektraenierhii z-za paškodžańnia elektrainfrastruktury.

Pavodle danych MAHATE, ciaham apošniaha tydnia na ŭsich piaci ŭkrainskich AES fiksavalisia albo bajavyja dziejańni, albo pavietranyja tryvohi. Pobač z Čarnobylskaj i Chmialnickaj stancyjami naziralisia vajskovyja abjekty, kala Zaparožskaj AES čuvać vybuchi, a kala Paŭdniova-Ukrainskaj AES amal štodnia abjaŭlali pavietranyja tryvohi, u tym liku byŭ zafiksavany vajskovy latalny aparat na adlehłaści kala 10 kiłamietraŭ.

Kamientary da artykuła