Kaleśnikava: Ja nie razumieju, čamu Jeŭropa nie pačała pieramovy z Łukašenkam raniej za ZŠA
U pieršym paśla vyzvaleńnia intervju Maryja Kaleśnikava zaklikała jeŭrapiejskich lidaraŭ šukać zbližeńnia z Alaksandram Łukašenkam.
Maryja Kaleśnikava i prezident Niamieččyny Frank-Valter Štajnmajer, 15 studzienia 2026. Fota Photo by Soeren Stache/picture alliance via Getty Images
«Čym bolšaj budzie izalacyja Biełarusi ad Jeŭropy, tym bolš jana budzie vymušana zbližacca z Rasijaj, — skazała jana FT padčas intervju ŭ Bierlinie. — Heta robić Biełaruś mienš biaśpiečnaj i mienš pradkazalnaj dla Jeŭropy».
Kaleśnikavu spytali pra parvany pašpart, kali jana vyskačyła z mašyny na miažy i pajšła nazad u bok Minska. Jaje čakaŭ 11‑hadovy turemny termin.
«Ciapier ja razumieju, što heta byŭ niejki kiniematahrafičny momant, — adkazała jana z uśmieškaj. — Ale heta nie było impulsiŭna. Zadoŭha da hetaha ja vyrašyła, što palityk pavinien dzialić los svajho naroda — i nie tolki ŭ chviliny ŭzdymu».
Kaleśnikava kaža, što «nadzvyčaj udziačnaja [prezidentu ZŠA] Donaldu Trampu, ukrainskamu boku i inšym udzielnikam vyzvaleńnia».
«Ale jak čałaviek ź jeŭrapiejskim mientalitetam, ja nie razumieju, čamu Jeŭropa nie pačała razmaŭlać z Łukašenkam raniej za ZŠA, — skazała Kaleśnikava. — Vidavočna, što Hiermanija, naprykład, maje značna bolš suviaziaŭ ź Biełaruśsiu, čym Štaty».
Jaje arhumientacyja idzie ŭrazrez z padychodam Jeŭropy, jaki palahaje ŭ padtrymcy suviaziaŭ ź biełaruskimi demakratyčnymi siłami ŭ vyhnańni, minimizacyi kantaktaŭ z režymam i zachavańni ekanamičnych sankcyj na ekspart, zabaronie na paloty i bolš žorstkich vizavych praviłach, zaŭvažaje vydańnie.
Abmiežavańni ŭ dačynieńni da Biełarusi stali mocnym udaram dla «vysokajeŭrapieizavanych» biełarusaŭ, skazała Kaleśnikava: «Kraina kaliści była lidaram pa kolkaści vydadzienych šenhienskich viz ES».
Jeŭropa pavinna rabić naadvarot, ličyć Kaleśnikava.
«Łukašenka — prahmatyčny čałaviek. Jon razumieje movu biźniesu. Kali jon hatovy na humanitarnyja kroki ŭ adkaz na źmiakčeńnie sankcyj, uklučajučy vyzvaleńnie źniavolenych i dopusk niezaležnych ŚMI i NDA ŭ Biełaruś, heta treba abmiarkoŭvać».
Prasoŭvańnie takoha dyjałohu — asabliva nakiravanaha na vyzvaleńnie inšych palitviaźniaŭ i praduchileńnie dalejšych represij — ciapier źjaŭlajecca jaje fokusam:
«Dumaju, jasna, što ja nie sychodžu z palityki».
«Adnojčy režym źmienicca, — skazała jana. — I da hetaha momantu tam nie pavinna być vypalenaj ziamli. My pavinny rychtavać hlebu».
Kaleśnikava skazała, što jaje źniavoleńnie było «ciažkim», ale jana nie choča abmiarkoŭvać žachlivyja ŭmovy.
«Usie i tak viedajuć, što takoje biełaruskija turmy. Kamu heta dapamoža?»
Jana raskazała, što ŭ adzinočnaj kamiery jana «traciła pa dźvie hadziny ŭ dzień na johu i praktykavańni — heta byŭ čas dla miedytacyi», pračytała «700 knih z turemnaj biblijateki i napisała jašče dźvie» (choć jaje natatki tak i nie viarnuli), i navat «zmahła sieści na špahat».
Časam joj dazvalali słuchać dziaržaŭnaje radyjo. «Ja tančyła, ja radavałasia žyćciu. Kali ja raptam čuła Stynha ci Adel, ja była takaja ščaślivaja: cyvilizacyja isnuje, voś jana. Heta realna. A ścieny, turma — heta prosta dekaracyi».
Paśla vyzvaleńnia jana taksama płanuje viarnucca da pracy ŭ śfiery kultury.
«Ja čałaviek mastactva, usia suśvietnaja kultura ŭnutry mianie. U heta ciažka pavieryć, ale ŭ turmie ja adčuvała siabie absalutna volnym čałaviekam».
{POLL#1261}