U Estonii zabrali čempijanat Jeŭropy pa fiechtavańni za admovu vydać vizy rasijanam i biełarusam
Čempijanat Jeŭropy pa fiechtavańni sioleta projdzie z 16 pa 21 červienia nie ŭ estonskim Talinie, jak płanavałasia raniej, a ŭ francuzskim horadzie Antani pad Paryžam, paviedamlaje Delfi.ee.
Zdymak ilustracyjny. Fota: freepik.com
Admiena čempijanatu ŭ Estonii źviazanaja z patrabavańniem Mižnarodnaj fiederacyi fiechtavańnia (FIE) dapuścić da ŭdziełu ŭ im spartsmienaŭ z krain-ahresaraŭ — Rasii i Biełarusi. Estonija ž pryncypova nie vydaje vizy pradstaŭnikam hetych krain.
«Estonija nie moža harantavać, što ŭsie achvotnyja ŭdzielničać u čempijanacie zmohuć pierasiačy miažu», — zajaviŭ u śniežni minułaha hoda namieśnik sakratara pa sporcie Ministerstva kultury Estonii Rajda Mit. Jon padkreśliŭ, što pazicyja ŭrada była adnaznačnaj: vizaŭ dla spartsmienaŭ krain-ahresaraŭ nie vydajecca, nijakich vyklučeńniaŭ nie robicca.
Estonija atrymała prava pravodzić čempijanat Jeŭropy ŭ 2024 hodzie. Hienieralny sakratar Estonskaha sajuza fiechtavańnia Ajvar Paałbierh patłumačyŭ, što na toj momant dziejničali inšyja praviły FIE dla spartsmienaŭ z Rasii i Biełarusi, jakija na praciahu hoda niekalki razoŭ źmianialisia.
Spačatku pradstaŭnikam Rasii i Biełarusi dazvalali vystupać na indyvidualnych spabornictvach u niejtralnym statusie pry ŭmovie, što jany nie źviazanyja z armijaj. Paźniej hetaje patrabavańnie admianili. Ciapier spartsmien moža być vajskoŭcam, ale pavinien zajavić, što nie padtrymlivaje vajnu suprać Ukrainy, što ciažka praktyčna kantralavać. Apošniaje rašeńnie FIE dazvalaje junijoram i kadetam z Rasii i Biełarusi ŭdzielničać u spabornictvach siarod ravieśnikaŭ pad ściaham i kolerami svajoj krainy.
Čytajcie taksama:
Da čempijanatu śvietu pa fiechtavańni dapuścili navat «niejtralnych» rasijskich aficeraŭ
Biełaruskim fiechtavalščykam dazvolili vystupać na mižnarodnych spabornictvach