ZŠA źviazali harantyi biaśpieki dla Ukrainy ź pieradačaj Danbasa Rasii — FT
Administracyja Donalda Trampa dała zrazumieć Kijevu, što padpisańnie harantyj biaśpieki mahčymaje tolki paśla taho, jak Ukraina zaklučyć mirnuju damovu z Rasijaj.
Ukrainskija vajskoŭcy ŭ Kramatorsku. Fota: Diego Herrera Carcedo/Anadolu via Getty Images
Financial Times sa spasyłkaj na vosiem krynic piša, što hetaje pahadnieńnie, chutčej, budzie ŭklučać pieradaču Danbasa pad kantrol Maskvy.
Vašynhton vykarystoŭvaje pytańnie harantyj jak ryčah cisku. Pavodle źviestak vydańnia, ZŠA hatovyja paabiacać Ukrainie maštabnyja pastaŭki ŭzbrajeńnia dla vojska mirnaha času, ale vystaŭlajuć umovu, što Uzbrojenyja siły Ukrainy pavinny adyści z terytoryj, jakija jany ciapier kantralujuć na ŭschodzie. Ukrainskija i jeŭrapiejskija čynoŭniki ŭ razmovie z FT nazvali takuju taktyku ZŠA sprobaj «vykrucić ruki» Kijevu dziela kampramisu z Maskvoj.
Kamanda Uładzimira Zialenskaha raźličvała na advarotny paradak dziejańniaŭ — spačatku atrymać harantyi, kab uzmacnić pieramoŭnuju pazicyju, i tolki paśla hetaha abmiarkoŭvać terytaryjalnyja pytańni.
U Biełym domie infarmacyju pra prymus da zdačy terytoryj nazvali «niepraŭdzivaj», zajaviŭšy, što rola ZŠA — tolki zblizić pazicyi bakoŭ, a ŭmovy miru zaležać ad Ukrainy i Rasijskaj Fiederacyi.