Dačka śpikiera Sierhiejenki ŭładkavałasia na pracu ŭ Ministerstva pracy
Dačka staršyni Pałaty pradstaŭnikoŭ, a ŭ minułym kiraŭnika Administracyi Łukašenki i vysokapastaŭlenaha kadebista Ihara Sierhiejenki paśla ŭniviersiteta pačynaje budavać karjeru.
Hanna Sierhiejenka. Fota: dompressy.by
Hanna Sierhiejenka letaś skončyła jurydyčny fakultet BDU. Dziaŭčynu ŭznaharodzili jak najlepšuju vypusknicu ŭniviersiteta 2025 hoda — jana była staršynioj studenckaj rady fakulteta, udzielničała ŭ jurydyčnych alimpijadach. Paśla vypusku Hanna praciahnuła vučobu ŭ mahistratury.
Na ŭznaharodžańni najlepšych vypusknikoŭ BDU, pobač — rektar univiersiteta Andrej Karol. 27 červienia 2025 hoda. Fota: pres-słužba BDU
Z Andrejem Šydłoŭskim, na toj čas dekanam jurfaka BDU. 27 červienia 2025 hoda. Fota: pres-słužba BDU
Ale i pracu znajšła. 21‑hadovaja Hanna ŭładkavałasia hałoŭnym śpiecyjalistam jurydyčnaha ŭpraŭleńnia Ministerstva pracy i sacyjalnaj abarony.
Na novym miescy jana ŭznačaliła taksama piarvičku BRSM.
Hanna (pa centry) z kalektyvam Minpracy i sienataram i byłym kiraŭnikom BRSM Alaksandram Łukjanavym. Fota: alexander_lukyanau / Instagram
U krasaviku 2025‑ha Hanna raskazvała taksama, što vyrašyła pajści na kursy televiadučych pry Biełteleradyjokampanii, kab pavysić uzrovień upeŭnienaści ŭ sabie.
Jana tłumačyła, čamu vybrała śpiecyjalnaść jurysta: «U školnyja hady mnie chaciełasia bolš razumieć tyja pracesy, jakija adbyvajucca ŭ dziaržavie, raźbiracca ŭ palitycy i ŭmieć piśmienna tłumačyć hramadzianam nastupstvy nievykanańnia zakonaŭ našaj krainy».
Na liniejcy pieršakurśnikaŭ jurfaka BDU dziaŭčyna była viadučaj. 1 vieraśnia 2025 hoda. Fota: law.bsu.by
Raniej «Naša Niva» raskazvała bolš pra Hannu. Jana ŭdzielničała ŭ mnohich ideałahičnych mierapryjemstvach na fakultecie, chadziła na vystupleńni Ryhora Azaronka, lubiła kaštavać desierty ŭ elitnym restaranie ŭ Drazdach Astoria Riverside.