Na Sicylii paśla štormu ceły horad apynuŭsia na krai prorvy

Miastečka Nišemi na Sicylii apynułasia na miažy źniknieńnia praz apoŭzień ziamli. Mer horada Masimilijana Konci nazvaŭ situacyju «krytyčnaj» paśla mocnaha štormu, jaki vyklikaŭ maštabny abvał častki pahorka, pakinuŭšy žyłyja damy litaralna nad prorvaj, paviedamlaje The Guardian.

Skrynšot ź videa

Ź niadzieli apoŭzień raspaŭsiudziŭsia na front prykładna 4 kiłamietry. Z damoŭ užo evakujavali kala 1,5 tysiačy čałaviek. Ryzyka pašyreńnia apoŭźnia zachoŭvajecca, i ŭłady ŭžo bajacca za histaryčny centr horada. Mer paprasiŭ žycharoŭ za miežami aharodžanych zon zastavacca doma. Pa jaho słovach, siarod ludziej paciarpiełych niama, ale šmat damoŭ atrymali surjoznyja paškodžańni.

Na fotazdymkach i videa bačnyja damy na miažy abvału. Kiraŭnik słužby hramadzianskaj abarony Sicylii Salvatore Kačyna papiaredziŭ, što ŭsie budynki ŭ radyusie 50—70 mietraŭ abaviazkova abrynucca. U Nišemi zakrytyja škoły, darohu da prybiarežnaha pasielišča Džeła pierakryli. Častka evakujavanych žyvie ŭ svajakoŭ, sotni ludziej pravodziać nočy ŭ miascovym spartyŭnym kompleksie.

Mer adznačyŭ, što žychary napałochanyja: tolki ŭ aŭtorak adbyłosia prasiadańnie apoŭźnia jašče na 10 mietraŭ.

«Z pavietra było strašna bačyć, jak naš Nišemi litaralna razvalvajecca. Situacyja krytyčnaja: ziamla praciahvaje ruchacca, a daždžy ŭskładniajuć jak ratavalnyja raboty, tak i techničnyja abśledavańni», — padkreśliŭ Konci.

Asobnuju zakłapočanaść vyklikaje ryzyka poŭnaj izalacyi horada. Situacyja kantralujecca 24 hadziny na sutki, bo moža źmianicca ŭ luby momant.

Italjanski ŭrad uvioŭ nadzvyčajny stan u paŭdniovych rehijonach, paciarpiełych ad cykłonu «Hary». Mocny štorm prynios daždžy i chvali da 9 mietraŭ, zrujnavaŭ darohi, bierahavyja ŭmacavańni i kurortnuju infrastrukturu ŭ Sicylii, Kałabryi i na Sardynii. Ahulnyja straty aceńvajucca ŭ bolš za 1 miljard jeŭra. Pieršapačatkova ŭrad vydzieliŭ 100 miljonaŭ jeŭra na nieadkładnyja patreby. Ministr hramadzianskaj abarony Nieła Musumiečy paviedamiŭ, što budzie pryniata asobnaje mižviedamasnaje rašeńnie dla adnaŭleńnia paškodžanaj infrastruktury.

Tolki na Sicylii straty składajuć kala 740 miljonaŭ jeŭra, adnak kiraŭnik rehijonu Renata Skifani papiaredziŭ, što kančatkovaja suma moža być udvaja bolšaj.

Kamientary da artykuła