Jehipiet za $900. Biełarusy kupili haračy tur i raskazali, što atrymali za hetyja hrošy

Siamja z Mahilova adpačyła ŭ Churhadzie pa haračaj pucioŭcy i padzialiłasia vopytam spantannaha padarožža: ad pošuku «smačnaj» cany da padrabiaznaha raskładu aktyŭnaściaŭ. Ci apraŭdała siabie staŭka na pravierany hatel i čaho nie chapiła turystam dla poŭnaha ščaścia, raźbiraŭsia Myfin.by.

«Usio ŭklučana» za $1 791 na dvaich

Mahiloŭcy Ina i Valeryj płanavali svoj adpačynak na studzień, ale na ŭsialaki vypadak vyrašyli ŭ pačatku śniežnia jašče raz pramanitoryć košt turaŭ. Siarod mnostva varyjantaŭ vyskačyła pryvabnaja cana: $1791 na dvaich za 11 dzion pa sistemie «ŭsio ŭklučana». Vylatać treba było praz tydzień z Maskvy.

«Da taho ž heta byŭ naš lubimy 4‑zorkavy hatel Beach Albatros Resort, raniej my tam užo adpačyvali niekalki razoŭ. Tamu rašeńnie pryniali chutka: lacim! Praź siem dzion vyjechali na mašynie ŭ Maskvu, u aeraport nas pryvioz syn».

Mahiloŭcy pryzvyčailisia adpačyvać aktyŭna. Dla Iny ŭ pryjarytecie byli joha, step-aerobika i tancy. U raskładzie ranicaj i ŭviečary čarhavalisia bačata, salsa i zumba. Valeryj pravodziŭ bolšuju častku času na valejbolnaj placoŭcy, dzie źbiralisia pa-sapraŭdnamu mocnyja kamandy.

«U hateli spadabałasia absalutna ŭsio. Numary śviežyja, ź jakasnym ramontam. Nam dastaŭsia numar ź vidam na «dzikaje mora»: płavać tam zabaroniena, ale možna špacyravać uzdoŭž uźbiarežža. Adzinaje, čaho nie chapiła, — heta času: chaciełasia b dadać da adpačynku jašče chacia b dni z čatyry.

Asabliva adznaču charčavańnie: paŭnavartasnaje, zbałansavanaje i pa-sapraŭdnamu zdarovaje.

U mieniu sustrakałasia praktyčna luboje miasa, akramia śvininy: indyčacina, kuracina, jałavičyna. Rybny stoł taksama ŭraziŭ: stronha, darada, krevietki i kalmary. Paradavali jahady i sadavina. Na śniadanak padavali cudoŭny miod u sotach i śviežavycisnutyja soki, jakija hatavali prosta pry nas. Usio, uklučajučy roznyja vidy bulby, ad varanaj da fry, było pryhatavana pa-chatniamu smačna. Asobnaj zhadki zasłuhoŭvaje kaviarnia ź vielizarnym vybaram pirožnych, śviežaj vypiečki i nadzvyčaj duchmianaj kavaj».

Ahulny biudžet pajezdki — krychu bolš za $2 000

U śniežni, kaža Ina, adpačyvać u Jehipcie idealna: kamfortnaje mora 23—24 hradusy, tempieratura pavietra 26—28 hradusaŭ. Važnaj pieravahaj hatela byŭ piasčany plaž sa zručnym, spadzistym uvachodam u mora. A ź pirsa možna było nazirać za mnostvam ryb, jakimi tak słavicca Čyrvonaje mora.

«Terytoryja hatela dahledžanaja, vielmi zialonaja, usiudy čyścinia i ŭtulnaść. Asabliva zapomniłasia palmavaja aleja z pryhožaj viečarovaj padśvietkaj. Infrastruktura pradumanaja, jość akvaparki dla darosłych i dziaciej, a taksama dziciačy kłub. Darečy, hatel vielmi papularny ŭ siemjaŭ ź dziećmi ŭsich uzrostaŭ, ad niemaŭlataŭ da padletkaŭ. Taksama mielisia dva ciopłyja basiejny: adzin bližej da mora, druhi — u hłybini terytoryi».

Pa viečarach taksama nie było sumna, dla haściej arhanizoŭvali zabaŭlalnyja prahramy — jak dla dziaciej, tak i dla darosłych. Piersanał byŭ nienaviaźlivym, usie dobrazyčlivyja i vietlivyja.

«Metaj našaj pajezdki byŭ rełaks i azdaraŭleńnie: chaciełasia padychać marskim pavietram, sahrecca na soncy i papoŭnić deficyt vitaminu D, hulajučy basanož pa ciopłym piasku. Dla nas krytyčna važny suchi klimat, jaki dabratvorna ŭpłyvaje na dychalnyja šlachi. Za miežy hatela nie vyjazdžali — za 11 dzion u hetym nie ŭźnikła nieabchodnaści. Usie znakavyja miescy rehijona my naviedali raniej, tamu marnavać čas i dadatkovyja srodki na ekskursii nie było ni sensu, ni žadańnia».

Muž i žonka ličać, što cana za adpačynak całkam adpaviadaje jakaści, a vydatki apraŭdanyja. Ahulny biudžet pajezdki skłaŭ $2 010. Kala $100 kaštavaŭ dyziel da Maskvy i nazad, u rajonie $20 patracili ŭ darozie na čaj, vadu i pierakus. Pa $25 z čałavieka zapłacili za vizy ŭ aeraporcie Churhady, jašče $50 pakinuli ŭ aptecy — kuplali vitaminy.

Kamientary da artykuła