Mužčyna ŭ Hrodnie skraŭ televizar, ale hledzieć jaho bajaŭsia
U kancy studzienia supracoŭniki adździeła pa baraćbie z ekanamičnymi złačynstvami Kastryčnickaha RUUS u Hrodnie atrymali infarmacyju što ŭ adnoj z handlovych arhanizacyj padčas pieraŭliku nie daličylisia televizara. Kudy źnik tavar, udałosia chutka vyśvietlić.
Akazałasia, što ŭ apošni tydzień śniežnia 25‑hadovy kiroŭca słužby dastaŭki pieravoziŭ viernutyja tavary z punkta vydačy markietpłejsa. Jamu spadabaŭsia televizar, jaki klijenty nie vykupili, i mužčyna vyrašyŭ pakinuć jaho sabie. Na składzie jon nie vyhruziŭ patrebnuju skrynku, a kab zabłytać elektronnuju sistemu ŭliku, adskanavaŭ jaje razam z astatnim «admoŭlenym» tavaram. Suma naniesienaj škody skłała amal 600 rubloŭ.
Pry hetym skradzieny televizar mužčyna nie pradaŭ i navat nie karystaŭsia im. Pavodle jaho słoŭ, jon bajaŭsia ŭklučać pryładu, bo mierkavaŭ, što jana moža vydać jaho miescaznachodžańnie siłavikam. Tamu amal miesiac technika zachoŭvałasia ŭ jaho doma ŭ zavadskoj upakoŭcy. Adnak takaja «kanśpiracyja» nie dapamahła.
U dačynieńni da kiroŭcy zaviali kryminalnuju spravu pa artykule «Prysvajeńnie abo rastrata». Jamu pahražaje da čatyroch hadoŭ pazbaŭleńnia voli.
Čytajcie taksama:
U madrydskim aeraporcie ŭ śpievaka skrali zaplečnik z 2,5 miljonami dalaraŭ
U Aŭstryi biełarusa zatrymali za kradziež z kram śpirtnych napojaŭ