Na vajnie va Ukrainie zahinuŭ kamandzir armianskaha bataljona «ArBat», były «vahnieraviec» Ajk Hasparan
Na vajnie suprać Ukrainy zahinuŭ vajskoviec rasijskaj armii, kamandzir «Armianskaha bataljona» («ArBat») Ajk «Abrek» Hasparan. Pra heta paviedamili akupacyjny kiraŭnik Horłaŭki Ivan Prychodźka i Z-błohier Uładzisłaŭ Zizdok, piša «Novaja hazieta Jeŭropa».
Fota: Rasija-24
Pavodle ich słoŭ, Hasparan zahinuŭ siońnia, 9 lutaha, padčas vykanańnia bajavoha zadańnia. Inšyja padrabiaznaści jaho śmierci nie raskryvajucca.
Ajk Hasparan naradziŭsia ŭ Karabachu. U Rasii jon byŭ asudžany za ŭzbrojenaje rabavańnie. Padčas adbyvańnia pakarańnia ŭ kałonii jaho zavierbavała PVK «Vahnier», paśla čaho jon adpraviŭsia na vajnu suprać Ukrainy. Paźniej Uładzimir Pucin asabista ŭručaŭ Hasparanu miedal «Za advahu».
U 2022 hodzie kryminalny aŭtarytet z Danieckaj vobłaści Armien Sarkisian zasnavaŭ armianski dobraachvotnicki bataljon «ArBat» i zaniaŭsia padrychtoŭkaj bajcoŭ dla ŭdziełu ŭ vajnie suprać Ukrainy. U 2023 hodzie kamandziram bataljona staŭ Ajk Hasparan.
Sarkisian zahinuŭ u lutym 2025 hoda ŭ vyniku vybuchu ŭ žyłym kompleksie «Ałyje parusa» ŭ Maskvie. Pavodle danych ŚMI, napad moh ździejśnić teraryst-śmiarotnik. Śledčy kamitet u jakaści pryjarytetnaj viersii zabojstva Sarkisiana razhladaŭ pieradzieł śfier upłyvu, źviazany ź jaho biznes-intaresami.