U fajłach Epštejna zhadvajecca znakamitaje biełaruskaje madelnaje ahienctva

Siarod apublikavanych fajłaŭ skandalna viadomaha amierykanskaha finansista Džefry Epštejna znajšlisia listy ad biełaruskaha madelnaha ahienctva «Studyja Tamara».

Džefry Epštejn. Fota: Rick Friedman/Rick Friedman Photography/Corbis via Getty Images

U fajły trapiła pierapiska biełaruskaha ahienctva z francuzskim madelnym ahienctvam Mademoiselle Agency. Jana viałasia napačatku 2013 hoda.

U šapcy lista možna pabačyć imia Tamary Hančarovaj. Jana adpraŭlała pradstaŭnicy francuzskaha ahienctva zdymki adnoj z madelaŭ. U naźvie dałučanych fajłaŭ jość słova «bikini».

U inšym liście, jaki padpisany «Studyja Tamara», napisana: «Ja taksama budu vielmi rada, kali ŭ nas znoŭ pojdzie supracoŭnictva! Vysyłaju dla pačatku 4‑ch dziaŭčat. Dajcie viedać, što vy dumajecie ź ich nahody! Jak tolki budzie vynik, budu dumać, kaho prapanavać jašče».

Pradstaŭnik ža Mademoiselle Agency pierapisvaŭsia napramuju z samim Epštejnam — razmova zvyčajna išła pra roznych dziaŭčat. Pierasyłajučy finansistu listy ad biełaruskaha ahienctva, jon napisaŭ: «Pryjazdžaje ŭ sakaviku. 18 hadoŭ». 

Ci viedała «Studyja Tamara», što ich listy pierasyłajucca dalej, ci chtości z madelaŭ ahienctva ŭ vyniku pryjazdžaŭ na prośbu Epštejna, nieviadoma.

«Studyja Tamara» — adno sa starejšych biełaruskich madelnych ahienctvaŭ. Jaho zasnavała Tamara Hančarova, jakaja sama pracavała madellu jašče ŭ SSSR.

Ahienctva śpiecyjalizujecca na pošuku, adbory i prasoŭvańni madelaŭ — jak pačatkoŭcaŭ, tak i pracujučych. Samaj viadomaj ich prateže ličać Marynu Linčuk, jakaja stała supiermadellu i pracavała z takimi brendami jak Dior, Hugo Boss, Dolce & Gabbana, Versace.

Kamientary da artykuła