Ukrainiec budzie zmahacca za «šlem pamiaci» na Alimpijadzie. Chto na im — poŭny śpis
Mižnarodny alimpijski kamitet zabaraniŭ ukrainskamu spartsmienu Uładzisłavu Hieraskieviču vystupać u šlemie z fotazdymkami spartsmienaŭ, jakija zahinuli padčas vajny Rasii suprać Ukrainy. MAK adchiliŭ prośbu Hieraskieviča i prapanavaŭ jamu nadzieć čornuju paviazku, kab ušanavać ich pamiać, piša Bi-bi-si — Ukraina.
Fota: Andrew Milligan / PA Images via Getty Images
Skieletanist Hieraskievič raźmiaściŭ na svaim šlemie partrety ŭkrainskich spartsmienaŭ, jakija zahinuli padčas vajny.
Jon paviedamiŭ, što MAK zabaraniŭ jamu ŭ hetym šlemie i vystupać, i treniravacca. «Rašeńnie, jakoje prosta raźbivaje serca», — prakamientavaŭ zabaronu Hieraskievič u X.
Pavodle jaho słoŭ, paśla takoha rašeńnia ŭźnikaje adčuvańnie, što «MAK zdradžvaje tym spartsmienam, jakija byli častkaj alimpijskaha ruchu». Jon kaža, što kamitet nie daje mahčymaści ŭšanavać ich na arenie, kudy hetyja spartsmieny bolš nikoli nie zmohuć vyjści. Hieraskievič paviedamiŭ, što rychtuje aficyjny zapyt da MAK i budzie zmahacca za svajo prava nasić mienavita hety šlem.
Uładzisłaŭ Hieraskievič nios ukrainski ściah na adkryćci Alimpijady ŭ Miłanie.
Historyju prakamientavaŭ Uładzimir Zialenski. Jon padziakavaŭ ukrainskamu spartsmienu za toje, što toj «nahadvaje śvietu canu našaj baraćby».
«Hetaja praŭda nie moža być niazručnaj, niedarečnaj ci nazyvacca «palityčnaj akcyjaj na spabornictvach». Heta napamin usiamu śvietu pra toje, što takoje sučasnaja Rasija», — adznačyŭ Zialenski.
Ministr zamiežnych spraŭ Andrej Sibiha dadaŭ:
«Šlem pamiaci nie moža być zabaronieny — va ŭšanavańni ŭkrainskich spartsmienaŭ, zabitych Rasijaj, niama ničoha palityčnaha. Hetyja złačynstvy nielha zamoŭčvać. My nastojvajem na spraviadlivym kančatkovym rašeńni MAK».
«Šlem pamiaci» i śpis zahinułych
Pra svoj «šlem pamiaci» Uładzisłaŭ Hieraskievič raniej raspaviadaŭ u intervju «Suśpilnomu». Na im namalavanyja vyjavy niekatorych spartsmienaŭ, jakija zahinuli za apošnija čatyry hady padčas uvarvańnia Rasii.
«Niekatoryja ź ich byli členami alimpijskaha ruchu, alimpijskaj siamji; niechta — prosta dziećmi, jakija trapili pad rasijskija abstreły. Heta byli ludzi, jakija ŭsio žyćcio byli ciesna źviazanyja sa sportam, zaŭzieli za nas, byli našymi siabrami», — skazaŭ ukrainski skieletanist.
«Niekatoryja ź ich byli maimi siabrami», — dadaŭ Hieraskievič.
U kamientary Tribuna.com jon padaŭ paimienny śpis usich ludziej, čyju pamiać chacieŭ ušanavać:
-
Dźmitryj Šarpar — fihuryst, srebrany pryzior čempijanatu Ukrainy, udzielnik Junackich Alimpijskich hulniaŭ-2016; zahinuŭ u bajach pad Bachmutam u studzieni 2023 hoda.
-
Pavieł Iščanka — čatyrochrazovy čempijon Ukrainy pa mnahaborji, čempijon śvietu i Jeŭropy pa paŭerliftynhu; zahinuŭ padčas vykanańnia bajavoha zadańnia ŭ 2025 hodzie.
-
Maksim Haliničaŭ — baksior, pryzior Junackich Alimpijskich hulniaŭ, čempijon Jeŭropy siarod junakoŭ; zahinuŭ u sakaviku 2023 hoda na Łuhanščynie.
-
Jaŭhien Małyšaŭ — 19‑hadovy bijatłanist, udzielnik Junackich Alimpijskich hulniaŭ-2020; zahinuŭ u bajach za Charkaŭ u sakaviku 2022 hoda.
-
Andrej Kucenka — šmatrazovy čempijon Ukrainy pa viełasporcie, dobraachvotnik USU; zahinuŭ u lipieni 2024 hoda.
-
Alaksiej Łahinaŭ — chakieist, bramnik «Biełaha Barsa»; zahinuŭ u Łuhanskaj vobłaści ŭ 2023 hodzie.
-
Karyna Bachur — čempijonka Ukrainy i Jeŭropy pa kikboksinhu; zahinuła padčas rasijskaha abstrełu Charkaŭščyny ŭ 2025 hodzie.
-
Mikita Kazubienka — majstar sportu Ukrainy pa skačkach u vadu, trenier; zahinuŭ u 2025 hodzie padčas słužby ŭ Nachvardyi.
-
Raman Pališčuk — lohkaatlet (skački ŭ vyšyniu), vajskoviec USU; zahinuŭ u sakaviku 2023 hoda.
-
Andrej Jaremienka — barec hreka-rymskaha stylu, šmatrazovy pryzior čempijanataŭ Ukrainy; zahinuŭ u śniežni 2025 hoda.
-
Taras Špuk — trenier vieteranskaj zbornaj «Hulni niepakoranych»; zahinuŭ na froncie ŭ vieraśni 2025 hoda.
-
Fiodar Jepifanaŭ — fiechtavalščyk, majstar sportu Ukrainy, udzielnik čempijanatu śvietu siarod kadetaŭ; zahinuŭ na froncie ŭ 2023 hodzie.
-
Kaciaryna Trajan — lohkaatletka, vajskovaja 82‑j ADŠBr; zahinuła ŭ červieni 2025 hoda.
-
Uładzimir Andraščuk — lohkaatlet, udzielnik čempijanataŭ Jeŭropy siarod junakoŭ i moładzi; zahinuŭ u bajach pad Bachmutam u 2023 hodzie.
-
Alaksiej Chabaraŭ — majstar sportu mižnarodnaha kłasa pa stralbie, trenier; zahinuŭ u 2025 hodzie na Danieččynie.
-
Darja Kurdziel — 20‑hadovaja tancoŭščyca, pryziorka mižnarodnych turniraŭ; zahinuła ŭ vyniku abstrełu Kryvoha Roha ŭ 2022 hodzie.
-
Ivan Kananienka — ciažkaatlet, akcior, aficer USU; zahinuŭ u 2025 hodzie.
-
Alina Pierahudava — 14‑hadovaja ciažkaatletka, kandydatka ŭ zbornuju Ukrainy; zahinuła padčas abstrełu Maryupala.
-
Karyna Dziačenka — 11‑hadovaja himnastka; zahinuła razam ź siamjoj u Maryupali ŭ 2022 hodzie.
-
Viktoryja Ivaška — 9‑hadovaja dziudaistka; zahinuła padčas abstrełu Kijeva ŭ 2023 hodzie.
-
Maryja Lebiedź — 15‑hadovaja tancoŭščyca; zahinuła padčas rakietnaha ŭdaru pa Dniapry ŭ 2023 hodzie.
-
Nazar Zuj — juny baksior i futbalist; zahinuŭ razam z baćkami ŭ Maryupali ŭ 2022 hodzie.
Fota: Al Bello / Getty Images
Prapanavali čornuju paviazku zamiest šlema
MAK rastłumačyŭ, što zabarona šlema źviazanaja z praviłami Alimpijskaj chartyi.
«Praviła 50.2 zabaraniaje lubyja demanstracyi abo palityčnuju, relihijnuju ci rasavuju prapahandu na terytoryi Alimpijskich hulniaŭ», — zajaviŭ pradstaŭnik MAK Mark Adams. Jon dadaŭ, što arhanizacyja z samaha pačatku znachodziłasia ŭ dyjałohu sa spartsmienam i šukała kampramisnaje rašeńnie.
«My całkam razumiejem žadańnie spartsmienaŭ ušanoŭvać pamiać tych, chto zahinuŭ u vajnie va Ukrainie i ŭ inšych kanfliktach u śviecie. Ale my pavinny zasiarodzicca na sporcie i vynikach, zabiaśpiečyć roŭnyja pravy dla ŭsich atletaŭ i zachavać pole spabornictvaŭ svabodnym ad luboha ŭmiašańnia», — adznačyŭ Adams.
Pavodle jaho słoŭ, MAK pryjšoŭ da vysnovy, što vykarystańnie šlema z partretami zahinułych supiarečyć dziejnym praviłam.
«My paviedamili, što hety šlem parušaje praviły. U toj ža čas dazvolili Uładzisłavu Hieraskieviču vykarystoŭvać čornuju paviazku biez tekstu padčas spabornictvaŭ. Jon užo vykazaŭ svaju pazicyju ŭ sacyjalnych sietkach, i my ličym heta razumnym kampramisam», — dadaŭ pradstaŭnik MAK.
U MAK taksama padkreślili, što ŭ Hulniach udzielničajuć spartsmieny z bolš jak 90 krain, i kožny ź ich moža mieć ułasnyja pryčyny dla ŭšanavańnia pamiaci, tamu arhanizacyja vymušana «zachoŭvać dalikatny bałans».
Uładzisłaŭ Hieraskievič nie ŭpieršyniu vykarystoŭvaje Alimpijskija hulni jak placoŭku, kab nahadać śvietu pra vajnu Rasii suprać Ukrainy.
Na Hulniach u Piekinie ŭ 2022 hodzie jon pravioŭ «maŭklivy pratest» z płakatam «Nie vajnie va Ukrainie» — za niekalki dzion da pačatku poŭnamaštabnaha ŭvarvańnia.
U čaćvier na Alimpijadzie projdzie kvalifikacyja ŭ skieletonie, finały ŭ piatnicu.