BMW adklikaje bolš za paŭmiljona mašyn pa ŭsim śviecie. Jany mohuć zaharecca
Słavuty niamiecki aŭtavytvorca BMW abviaściŭ maštabnuju servisnuju kampaniju: kala 575 000 aŭtamabilaŭ pa ŭsim śviecie padlahajuć praviercy i ramontu z-za defiektu ŭ sistemie zapusku ruchavika. U kampanii papiaredžvajuć, što ŭ peŭnych umovach mašyna moža zaharecca, paviedamlaje Handesblatt.
Fota: BMW
Prablema źviazanaja z mahnitnym pieraklučalnikam (salenoidam) startara. U detalach, vypuščanych ź lipienia 2020 pa lipień 2022 hoda, pry častych zapuskach ruchavika adbyvajecca paskorany znos. Mietaličnyja čaścinki, jakija pry hetym utvarajucca, mohuć vyklikać karotkaje zamykańnie i pierahrevy, a ŭ najhoršym vypadku — uzharańnie aŭtamabila padčas ekspłuatacyi.
Da praviadzieńnia ramontu BMW rekamienduje ŭładalnikam nie pakidać aŭtamabil z zaviedzienym ruchavikom biez nahladu, asabliva pry vykarystańni funkcyi dystancyjnaha zapusku.
Adklikańnie zakranaje šyroki šerah madelaŭ:
- Siedany i kupe: 2 sieryja (G42), 3 sieryja (G20, G21, G28), 4 sieryja (G22, G23, G26), 5 sieryja (G30, G31), 6 GT (G32), 7 sieryja (G11, G12).
- Krasoviery: X3 (G01), X4 (G02), X5 (G05), X6 (G06).
- Rodstary: BMW Z4 (G29) i technična rodnasnaja joj Toyota Supra.
Halinovaje vydańnie kfz-Betrieb śćviardžaje, što havorka idzie pra 575 tysiač mašyn, ale sam aŭtavytvorca hetuju infarmacyju pakul nie paćvierdziŭ.
U miežach servisnaj kampanii na ŭsich zakranutych aŭtamabilach budzie całkam zamienieny startar. U asobnych vypadkach taksama spatrebicca zamiena akumulatara, kab jon adpaviadaŭ charaktarystykam novaha vuzła.
Čytajcie taksama:
Drobny ramont BMW skončyŭsia dla haspadara pažaram, škoda skłała 10 tysiač rubloŭ
Na aŭkcyjon vystavili kultavy niamiecki sportkar. Pradajuć usiaho za 390 rubloŭ