Na Niamizie ŭ Minsku dabudoŭvajuć šmatfunkcyjanalny kompleks z vadaspadam i drevami na dachu

12 lutaha kiraŭnik administracyi Maskoŭskaha rajona Minska Siarhiej Rubanaŭ naviedaŭ šmatfunkcyjanalny kompleks na vulicy Niamiha, 44, jaki ŭzvodzić kampanija «Sihmapolus». Pakolki abjekt znachodzicca ŭ centry horada, haradskija ŭłady nadajuć jamu asablivuju ŭvahu, piša ahienctva «Minsk-Naviny».

Hatoŭnaść hetaha budynka ŭžo składaje kala 75 %. Karkas užo amal całkam zašklony, ciapier zaviaršajecca mantaž aluminijevych kanstrukcyj vitražoŭ, a asnoŭnyja raboty viaducca ŭnutry.

Pavodle hałoŭnaha architektara Ivana Vinahradava, budynak budzie mieć aryhinalny vyhlad i vykanany z vykarystańniem unikalnych technałohij. Upieršyniu ŭ Biełarusi ŭ takim abjomie vykarystoŭvajucca radyusnyja (vyhnutyja) šklanyja vitražy. Kala kompleksu źjavicca vialiki dekaratyŭny vadaspad i štučny ručaj uzdoŭž fasada — jak simvał raki Niamihi.

Budynak budzie mieć roznuju pavierchavaść. U im praduhledžanyja trochuzroŭnievy parkinh, fudmoł, hipiermarkiet, handlovyja i ofisnyja pamiaškańni, u tym liku dvuchuzroŭnievaja krama z eskałataram. Pamiaškańni ŭžo aciaplajucca.

Asobnaj admietnaściu stanie ekspłuatavany dach, dzie płanujuć stvaryć zialonuju zonu z aŭtamatyčnaj sistemaj palivu. Drevy buduć vysadžvać u adkryty hrunt, a nie ŭ kantejniery.

Zaviaršyć budaŭnictva płanujuć da kanca 2026 hoda. Viasnoj tut pačniecca ŭparadkavańnie terytoryi: układka plitki i stvareńnie zialonych zon.

Kamientary da artykuła