Kali treba płacić padatak z pryzoŭ i suvieniraŭ, a kali nie — tłumačyć padatkovaja
U jakich vypadkach pryzy, padarunki i suvieniry ličacca dachodam, a ŭ jakich — nie? Kali koratka: nie ŭsie padarunki — heta dachod, jaki abkładajecca padatkam, piša Onliner.
Suvieniry ad dziaržorhanaŭ — biez padatku
Kali suvienirnuju abo pamiatnuju pradukcyju ŭručajuć udzielnikam aficyjnych mierapryjemstvaŭ, sustreč delehacyj, spartyŭnych abo kulturnych padziej, takija vydatki nie ličacca asabistym dachodam čałavieka.
Heta tyčycca vypadkaŭ, kali čałaviek vystupaje jak pradstaŭnik arhanizacyi abo dziaržorhana. Košt suvienira pry hetym značeńnia nie maje — padachodny padatak płacić nie treba.
A voś z pryzami ŭžo bolš składana
Pryzy, uznaharody i zaachvočvańni ŭ hrašovaj i naturalnaj formie ŭ cełym ličacca dachodam i abkładajucca padachodnym padatkam. Ale jość vyklučeńni.
Ad padatku vyzvalajucca:
- pryzy spartsmienam za mižnarodnyja i respublikanskija spabornictvy — va ŭstanoŭlenych pamierach;
- hrašovyja premii pieramožcam i ŭdzielnikam rajonnych, abłasnych i respublikanskich konkursaŭ, fiestyvalaŭ i inšych mierapryjemstvaŭ — u miežach, praduhledžanych zakanadaŭstvam;
- pryzy i padarunki ŭ naturalnaj formie (naprykład, kubki, miedali, suvieniry) dla pieramožcaŭ i ŭdzielnikaŭ takich mierapryjemstvaŭ — biez abmiežavańniaŭ pa košcie.
Kali arhanizacyja pravodzić konkurs malunkaŭ abo prajekt dla studentaŭ i ŭručaje ŭdzielnikam kubki, miedali abo suvieniry, to płacić padatak nie treba.
Toje ž tyčycca, naprykład, halinovaj spartakijady: kali pryz uručajecca ŭ naturalnaj formie, jon vyzvalajecca ad padachodnaha padatku.
Kali padatak usio ž daviadziecca płacić
Kali reč pieradajuć čałavieku ŭ asabistaje karystańnie i heta nie źviazana ź jaho pracaj abo aficyjnym mierapryjemstvam, taki padarunak mohuć pryznać dachodam — i tady daviadziecca zapłacić padatak.