Biełarusy raskazvajuć, jakija pradukty vykidajuć na ŭjeździe ŭ Polšču, a za što i štrafujuć
Biełaruska apublikavała ŭ Threads post pra toje, jak zachrasła na miažy Polščy ŭ punkcie propusku «Babroŭniki» praz žančynu, jakaja viezła miasnyja vyraby. Polskija mytniki jaje aštrafavali bolš čym na 100 jeŭra.
Punkt propusku «Bierastavica — Babroŭniki». Fota: DPK
Jak praviarajuć biełarusaŭ u hetym punkcie propusku, piša BGmedia.
Žančynu aštrafavali bolš čym na 100 jeŭra za toje, što viezła miasnyja vyraby
Biełaruska ŭ Threads paskardziłasia, što jaje aŭtobus prastajaŭ lišniuju hadzinu na miažy praz žančynu, jakaja viezła ŭ Polšču «kramu na kołach: kaŭbasy, sała, viandlinu». Mytniki aštrafavali jaje na 500 złotych (kala 119 jeŭra).
U kamientaryjach jana padzialiłasia padrabiaznaściami:
«Jechali Minsk — Biełastok praz «Babroŭniki». Miaža RB — 1 hadzina 15 chvilin. U zonie čakańnia 40 chvilin stajali na moście, jašče 1 hadzinu — na polskuju miažu. I 1 hadzinu — na vypisku štrafu. Heta značyć, 3 hadziny ahułam + 1 hadzina fors-mažoru».
«Aŭtobus byŭ nie poŭny, navat z ukrainskimi pašpartami chutka prapuskali. I za nami čarhi nie było — aŭtobus z Hrodna čakaŭ tolki praz hety durny štraf».
«Jana [žančyna, jakuju aštrafavali] na stancyi za Vaŭkavyskam padsieła, apošniaj pierad «Bierastavicaj». Tam heta ŭsieahulny biznes-prajekt».
Jak biełarusaŭ praviarajuć u punkcie propusku «Kazłovičy»
Žurnalisty BGmedia prahledzieli telehram-čat pra pamiežny pierachod «Bierastavica — Babroŭniki» za apošnija try tydni. Nižej — spravazdačy biełarusaŭ pra toje, jak polskija mytniki znachodziać zabaronienyja pradukty i štrafujuć ludziej. Usie jany jechali na aŭtobusach:
-
«RB — RP, 25 studzienia. 12.40 — vyjezd z Hrodna. 13.40 — miaža. 17.40 — vyjezd ź miažy. Praviarali rečy na skanierach, kaŭbasu vykidali, ale, mnie zdajecca, asabliva nie prydziralisia. 22.40 pa polskim časie — prybyćcio ŭ Hdańsk. Pa płanie byccam pavinny byli ŭ 20.30».
-
«RB — RP, 26 studzienia. 03.10 — na miažy, za hadzinu prajšli biełaruski kantrol, jašče hadzinu stajali niezrazumieła čamu. 07.50 — vyjechali z polskaj. Pałovu pravieryli na stužcy, a pałovu ŭručnuju, i šmat vykidali, asabliva jabłyki. Aharodninu, sadavinu nielha, ale banany možna… Vynik — 4 hadziny 40 chvilin na dźvie miažy».
-
«Hrodna — Varšava, 28.01. 22.10 — vyjechali. 23.20 — padjechali da miažy. 01.30 — vyjechali ź miažy (čas biełaruski). U palakaŭ rečy praz skanier — buterbrody i zhuščonku zabirali».
-
«RB — RP, 11 lutaha. Pryjechali a 03.30, biez čarhi ŭjezd. Mytny kantrol: čamuści paprasiŭ dastać usie valizki z aŭtobusa. Zatym hadzina ŭ kalejcy za furami da palakaŭ. Ujezd pieršymi, biez čarhi. Razbor sumak u palakaŭ sa štrafami tym, u kaho lubyja pradukty. 08.00 — vyjezd ad palakaŭ. ±5 hadzin prachodžańnia. Čas RB».
Jakija pradukty možna vieźci ŭ Polšču ź Biełarusi
U pieršuju čarhu polskich mytnikaŭ cikaviać cyharety i ałkahol. Z 25 vieraśnia 2025 hoda hramadzianie Biełarusi mohuć uvozić u Polšču praz punkt propusku «Tarespal» adzin litr mocnaha ałkaholu i dva pački cyharet. Niekatoryja pieravyšajuć hetuju normu, atrymlivajuć štrafy i zatrymlivajuć aŭtobusy.
Niekatoryja ŭmudrajucca vieźci ŭ Polšču sała, što zabaroniena. Prykłady z pryhraničnych čataŭ:
-
«Dla razumieńnia situacyi: my jašče staim u palakaŭ, čakajem aŭtobus z renthiena. U nas złavili mužyka z 5 kh sała. Byccam by štraf 500 złotych».
-
«Mała taho, što čałaviek z sałam zatrymaŭ vyjezd, dyk jašče nas pierasadzili ŭ Polščy ŭ bus, dzie niama miesca naohuł. Tak i płaci 50 jeŭra, a potym pakutuj».
-
«Asobnaje dziakuj mudakam z sałam 5 kh, hatovym udavicca za lišni pačak cyharet. Praz vas potym ludzi hadzinami stajać, čakajuć aŭtobus z renthiena i nie paśpiavajuć na svaje samaloty».
Biełarusy raspaviadajuć, što dakładna nielha vieźci ŭ Polšču zhuščonku. Kali mytniki znachodziać jaje, to vykidvajuć. Abychodzicca biez štrafaŭ, ale nie zaŭsiody. Karystalniki čataŭ spračajucca nakont buterbrodaŭ: adny kažuć, što ich vykidvajuć, inšyja — što nie. Mnohija ličać, što ŭsio zaležyć ad nastroju mytnika.
A voś prysmaki vieźci možna (u razumnaj kolkaści).