Paśla viartańnia z Polščy aryštavali suzasnavalnicu startapa GlobalTips. Joj dali try hady kałonii za dapamohu palitviaźniam

Alenu Zmuško schapili vosieńniu 2024 hoda. Doma jaje čakajuć muž i vaśmihadovy syn.

Alena Zmuško. Fota ź jaje staronki Ukantakcie

Hamialčancy Alenie Zmuško 39 hadoŭ.

U 2008‑m dziaŭčyna skončyła Biełaruski dziaržaŭny ŭniviersitet transpartu pa śpiecyjalnaści «Sistemy pieradačy i raźmierkavańnia infarmacyi».

Miarkujučy pa sacsietkach, va ŭniviersitecie jana paznajomiłasia sa svaim budučym mužam — uradžencam Narylska ź biełaruskimi karaniami, jaki taksama vučyŭsia ŭ BiełDUT. U pary jość 8‑hadovy syn.

Karjeru ŭ IT Alena pačała jašče ŭ 2008 hodzie ŭ kampanii Intervale, dzie ź pierapynkam pracavała da 2020 hoda. Tam jana vyrasła z teściroŭščyka da kiraŭnika techničnych prajektaŭ, zajmałasia mabilnymi płatformami dla bankaŭ i apierataraŭ suviazi. Kalehi adhukalisia pra Alenu jak pra taktoŭnaha i samaarhanizavanaha supracoŭnika, jaki ŭmieje znajści padychod da składanych zakazčykaŭ.

Z 2013 pa 2015 jana pracavała ŭ homielskaj kampanii Kwanza, u jakoj zajmałasia raspracoŭkaj sistemy prodažu elektronnych biletaŭ.

Apošnija hady siamja žyła ŭ Varšavie. Tam u lutym 2021 hoda Alena stała suzasnavalnicaj i viadučym biznes-analitykam startapa GlobalTips, jaki dapamahaje ŭstanovam pierajści ŭ «ličbu». Praź ich servis možna pakinuć bieznajaŭnyja čajavyja aficyjantam pa QR-kodzie.

Alena Zmuško. Fota ź jaje Linkedin

Viadoma, što Alena pieryjadyčna viartałasia ŭ Biełaruś. 13 listapada 2024 žančyna jechała dadomu razam z synam, kab naviedać baćkoŭ. Ale jaje zatrymali i kinuli ŭ SIZA.

Alenu asudzili ŭ Hrodzienskim abłasnym sudzie. 24 listapada 2025 hoda joj vynieśli prysud pavodle častak 1 i 2 artykuła 361‑4 KK (sadziejničańnie ekstremisckaj dziejnaści) — try hady kałonii. Niadaŭna jon ustupiŭ u siłu.

Pa źviestkach pravaabaroncaŭ, Alenu abvinavacili ŭ dapamozie palitviaźniam.

Zaraz palitźniavolenaja znachodzicca ŭ žanočaj papraŭčaj kałonii №4.

Kamientary da artykuła