«Skažycie, u jakoj Biełarusi siaredni zarobak 886 dalaraŭ?» — «Na małakazavodzie!»
Biełarusy ździvilisia ličbam siaredniaha zarobku, jakija ahučyŭ Łukašenka, i dzielacca svaimi realnymi dachodami.
Prymajučy spravazdaču ŭrada, Łukašenka adznačyŭ, što za minuły hod siaredni zarobak biełarusaŭ skłaŭ 2693 rubli, abo 886 dalaraŭ u ekvivalencie. Pry hetym rost dachodaŭ nibyta istotna apiaredžvaŭ rost pradukcyjnaści pracy. Pahladzieŭšy adpaviednaje videa ŭ tyktoku, ludzi ździvilisia ahučanym ličbam i raskazali pra svaje zarobki.
Najbolš łajkaŭ (zvyš 8100) nabraŭ kamientaryj:
«Skažycie, u jakoj Biełarusi siaredni zarobak 886$?»
Jaho aŭtaru patłumačyli:
«Prosta niechta jeść kapustu, a niechta miasa. A razam my jamo hałubcy. Voś tak i z zarobkam».
«Napeŭna, dalary z rublami pierabłytali»
Mnohija ludzi ŭpeŭnienyja, što havorka pavinna iści pra 886 nie dalaraŭ, a rubloŭ. Hetuju dumku padtrymali bolš za 6000 hledačoŭ.
«Prabačcie! Ja nie niedačuła?! ZP 886$? Dzie?! Ludzi dobryja, padkažycie, kali łaska!» — nie chavaje emocyj adzin hladač.
«Vybačajcie, ale, napeŭna, dalary z rublami pierabłytali», «voś i mnie tak zdajecca…», «Ale jon nie viedaje, što siaredni zarobak 886 biełaruskich rubloŭ», — padtrymlivajuć jaho inšyja.
Niekatoryja z sarkazmam zaŭvažajuć:
«Jon pra jakuju Biełaruś kaža?», «Vidać, ja žyvu nie ŭ Biełarusi», «A možna ja pierajedu ŭ tuju Biełaruś, dzie zarobak 880$, a to ja atrymlivaju 380$»
«Dyk jon raście pa prypiskach, a realny zarobak 900—1300, i toje da vyličeńnia padatkaŭ», — ličyć jašče adzin kamientatar, i jaho mierkavańnie padzialaje amal tysiača inšych.
Realnyja ličby
Ludzi masava dzielacca ličbami sa svaich raźlikovych listkoŭ:
«Jakija 886$? Ja pracuju zvarščykam, u mianie zarobak 500 rubloŭ, i toje nie zaŭsiody».
«U mianie naličeńnie 738 rub.».
«U mianie zarobak 670 rub.».
«U dziciačych sadkach my ź ciažkaściu 750 rubloŭ atrymlivajem».
«Pahladzicie, kali łaska, kolki atrymlivaje sanitarka ŭ balnicy, ślozy — 800 rubloŭ».
«Na fiermie pracuješ z 4 ranicy da 11 viečara, i ZP 800 rubloŭ u miesiac».
«Kłas, za miesiac 304 hadziny, ZP 1050, pracuju povaram na adpracoŭcy, kłas».
«1100 na zavodzie».
«Moj syn pracuje zvarščykam i atrymlivaje 1350 rubloŭ».
«Inžynier va ŭpraŭleńni aŭtobusnaha zavoda MAZ, bolš za 1600 jašče nie atrymlivaŭ».
«Adkul jon ličby hetyja biare? Jakija 3 tysiačy siarednija? Zarobak ludziej, jakich ja viedaju, 1300—1600».
«Ja dziela 700$ pracuju pa 10 hadzin, jem u mašynie, ssu z mašyny, siamju baču z mašyny, ale ja nie dapracoŭvaju da 880$. I majo kiraŭnictva kryčyć jašče, što ja mała pracuju) Žyviom».
«Ja chieraču z 7:00 i da 17:00, časam i da 18:00, byvaje i pa šeść dzion na tydzień, i 1500 u siarednim atrymlivaju, dyk kudy jašče bolš pracavać? Moža, uvohule žyć na pracy», — emacyjna vykazvajucca biełarusy.
Jašče adna hladačka źviartajecca naŭprost da Łukašenki:
«Pavažany Alaksandr Ryhoravič, 1200 rubloŭ — vychavacielka. Minsk. Kali ja atrymaju 886$? Dziakuj za ŭvahu».
«U ciabie ZP 1200, i ty kažaš «pavažany»?» — dziviacca joj u adkaz.
«Ceny rastuć, a nie zarobki»
Kamientatary taksama źviartajuć uvahu na toje, što ceny rastuć značna chutčej za dachody:
«A ceny ŭ kramach jon bačyŭ?»
«Łoł, zabylisia ŭ hetaje paraŭnańnie dadać vielmi važny składnik: «rost cen na ŭsie tavary», jaki ŭ siarednim składaje bolš za 110%».
«A čamu ceny na pradukty i kamunalnyja pasłuhi rastuć chutčej, čym ZP?»
«Ja baču, tolki ceny rastuć, a nie zarobki!»
«U abibokaŭ niama»
Praŭda, znajšlisia i tyja, chto śćviardžaje, što zarobki, nižejšyja za ahučanyja, byvajuć «tolki ŭ abibokaŭ».
I tolki adzin pasprabavaŭ pryvieści inšyja ličby:
«Chłuśnia. Na zavodzie małočnym ad 2500 da 5000 rubloŭ».