«Biełaruś nielha stračvać dla Jeŭropy, ale hetu asobu stracić dakładna varta». Zialenski patłumačyŭ, čamu ŭvioŭ sankcyi suprać Łukašenki

Pałovu svajho tradycyjnaha viečarovaha zvarotu prezident Ukrainy Uładzimir Zialenski 18 lutaha pryśviaciŭ tłumačeńniu, čamu jon uvioŭ sankcyi suprać Alaksandra Łukašenki i čamu heta adbyłosia mienavita ciapier.

Uładzimir Zialenski. Fota: Sean Gallup / Getty Images

«My adkazvajem takim rašeńniem na vidavočna bolšaje ŭciahvańnie Biełarusi ŭ vajnu Rasii suprać Ukrainy. Łukašenka pryzvyčaiŭsia handlavać suvierenitetam svajoj dziaržavy i zdaŭ šmat intaresaŭ Biełarusi. Zdaŭ rasijanam. Navat paŭnamaštabnuju vajnu Rasija pryniesła va Ukrainu ŭ tym liku z terytoryi Biełarusi — heta fakt.

Ale na praciahu doŭhaha času Łukašenka ŭsio ž taki ŭstrymlivaŭsia ad pramych žorstkich dziejańniaŭ na karyść Rasii.

Adnak z vosieni minułaha hoda Ukraina fiksuje na terytoryi Biełarusi retranślatary, jakija pracujuć na padtrymku ŭdarnych dronaŭ.

Mienavita dziakujučy hetym retranślataram Rasija ździajśniała ŭdary pa našych paŭnočnych rehijonach — ad Kijeva i Kijeŭskaj vobłaści da Vałynskaj vobłaści. Heta byli ŭdary pa enierhietycy, pa našaj čyhuncy. 

Taksama, na žal, Łukašenka praciahvaje padyhryvać Pucinu ŭ jahonaj niebiaśpiečnaj palityčnaj hulni z «Arešnikam». Heta ahulnajeŭrapiejskaja pahroza. Taksama Biełaruś i nadalej vykarystoŭvajuć jak bazu zabieśpiačeńnia kampanientaŭ, abstalavańnia, techniki dla rasijskaj armii.

Pa sukupnaści ŭsiaho hetaha my taksama mianiajem palityku i budziem adkazvać adekvatna pahrozie. U Minsku pavinny heta razumieć. Jość hety palityčny sihnał z sankcyjami.

Ja daručyŭ taksama ŭvažliva vyvučyć usie schiemy Łukašenki i jaho paplečnikaŭ.

My budziem supraćdziejničać bolš adčuvalna i budziem pracavać z našymi partniorami ŭ rehijonie i ŭsioj Jeŭropie, a taksama z hłabalnymi partniorami, kab jany całkam uśviedamlali, z čym majuć spravu, kali havorka viadziecca pra režym u Biełarusi.

Biełaruś — krainu, ludziej, narod, — nielha stračvać dla Jeŭropy, ale hetuju asobu, jakaja stavić Biełaruś na słužbu Rasii, dakładna varta stračvać», — zajaviŭ prezident Ukrainy.

Kamientary da artykuła