Trend siarod biełaruskich zumieraŭ i milenijałaŭ: usio bolš moładzi viartajecca žyć da baćkoŭ

Kali raniej u modzie była poŭnaja niezaležnaść, dziela jakoj ludzi hatovyja byli nienarmavana pracavać, to ciapier siarod moładzi ŭchvalajecca novaha typu daŭnšyftynh — sumiesnaje žyćcio z baćkami. Usio bolš 25‑hadovych i 30‑hadovych biełarusaŭ viartajucca ŭ baćkoŭskaje hniazdo paśla niaŭdałych sprob pažyć samastojna.

Trend aktualny i ŭ Biełarusi, i ŭ Rasii, i ŭ Kazachstanie. Skrynšot: Threads

«Mnie 30 hadoŭ, ja pierajechała žyć da maci, i mnie nie soramna. U mianie niama kvatery, mašyny, ja nie ŭ stasunkach, ale ja paśpieła pažyć u roznych krainach, zhaniać na zimoŭku ŭ Aziju i mientalna pastaleć, — znajomić sa svajoj bijahrafijaj biełaruska Dzijana.

Dziaŭčyna navažyłasia na taki krok, bo, na jaje pohlad, tak jana chutčej zmoža dasiahnuć svaich met, pastaŭlenych na 2026 hod.

«Pieršaje ŭ śpisie — abnavić techniku dla zdymak», — Dzijana zajmajecca rytualnymi pasłuhami, ale pry hetym viadzie błoh i dalej choča zarablać na žyćcio vyklučna stvareńniem kantentu jak dla błohieraŭ, tak i dla samoj siabie.

Skrynšot: instahram @diana.gliese

Ale hłabalna dziaŭčyna maryć pra stabilnaść i spakoj, jakich raniej jana była pazbaŭlenaja jakraz u pahoni za poŭnaj niezaležnaściu.

Biełaruska Ksienija taksama viarnułasia ŭ dom maci, pramianiaŭšy stalicu na viosku. U adnym z rolikaŭ jana iranizuje: «Nie treba mnie zajzdrościć, ale mnie bolš nie treba zdymać kvateru za 400 dalaraŭ».

Ksienija pačała z nula navučańnie na nutrycyjołaha, i z novaj nahruzkaj joj było b ciažej zarablać na arendu. Tamu jana i vyrašyła ekanomić, žyvučy z baćkami.

Ckrynšot: tyktok @ksenieh4

Taksama ź pierajezdam da maci Ksienija zmahła pachudzieć z 71 da 52 kiłahramaŭ. Ciapier jana dzielicca ŭ błohu pravieranymi zdarovymi receptami i ŭłasnymi pryncypami źmianšeńnia vahi.

Palina ŭ 2024‑m skončyła Biełaruski dziaržaŭny ekanamičny ŭniviersitet i paśla taksama nie paciahnuła koštu minskaj arendy, abraŭšy viarnucca da baćkoŭ u viosku Šemietava — svaim vymušanym krokam jana padzialiłasia ŭ kamientarach da videa Ksienii.

Padobnych historyj źjaŭlajecca ŭsio bolš, pryčynaj tamu sami zumiery i milenijały nazyvajuć ekanamičnyja prablemy: košt arendy, asabliva ŭ stalicy, niesuvymierny zarobkam. Toje samaje možna skazać i pra ceny na kuplu nieruchomaści.

«Adnamu siońnia nie vyžyć», — prychodzić da vysnovy moładź sa zvyčajnych siemjaŭ.

U kamientarach ludzi pastalej krytykujuć taki padychod i nazyvajuć jaho infantylnym, na što zumiery i milenijały pryhadvajuć dośvied niekatorych jeŭrapiejskich krain — prykładam, Italii, dzie praciahłaje suisnavańnie z baćkami pad adnym dacham, pryčym časam niekalkimi pakaleńniami — heta norma.

Praŭda, adzinki zaŭvažajuć, što dobra, kali jość kudy viartacca i kali siamja — adekvatnaja. Inakš u horšym vypadku možna apynucca na vulicy.

Darečy, siarod zumieraŭ i milenijałaŭ, u jakich chapiła finansavaj piśmiennaści dla taho, kab nazapasić hrošy na nabyćcio ścipłaj, ale ŭłasnaj chatki ŭ biełaruskaj vioscy, raspaŭsiudžany jašče adzin trend — Grandma core. Heta spakojnaje, pavolnaje žyćcio ŭ vioscy, adnak bieź sialanskich zaniatkaŭ, kali nie treba pałoć dziasiatki sotak bulby. Vyklučna kvietki i maleńki harodzik, viazańnie, žyvioły dla zadavalnieńnia i rełaks.

Niekatoryja nie strymlivajuć siabie i rašajucca na pakupku cełaj sielskaj škoły. 

Kamientary da artykuła