Rasija zachavaje mytny kantrol na miažy ź Biełaruśsiu. I heta nie časovaja miera
Rasija płanuje ŭzmacnić mytny kantrol na miažy ź Biełaruśsiu i Kazachstanam. Pra heta paviedamiŭ vice-premjer rasijskaha ŭrada Alaksiej Aviarčuk. Pavodle jaho słoŭ, kantrol budzie pastajannym i nakiravanym na baraćbu z tavarami, jakija, na dumku rasijskaha boku, stvarajuć niadobrasumlennuju kankurencyju na ŭnutranym rynku.
Fota ilustracyjnaje
Ź vieraśnia 2026 hoda Fiederalnaja mytnaja słužba Rasii źbirajecca ŭzmacnić pravierki z dapamohaj mabilnych hrup na miažy ź Biełaruśsiu. Padobnyja hrupy ŭžo dziejničajuć i kantralujuć pieravozku bujnych partyj tavaraŭ.
«Adrazu chaču skazać, što heta nie niejkaja časovaja kampanija, my budziem hety kantrol praciahvać pastajanna, — śćviardžaje Alaksiej Aviarčuk. — Na naš rynak traplajuć tavary, jakija stvarajuć niesumlennuju kankurencyju našamu ŭnutranamu rynku. I tut my nastrojeny na vielmi žorstkija miery dla taho, kab spyniać hetuju niesumlennuju praktyku».
Čakajecca, što novyja miery ŭ pieršuju čarhu zakranuć biznes i kampanii, jakija zajmajucca pastaŭkami pradukcyi. Dla zvyčajnych hramadzian, što pierasiakajuć miažu na asabistym transparcie, istotnych źmienaŭ pakul nie prahnazujecca — čerhi z-za pravierak małavierahodnyja.
Akramia taho, rasijskija kantrolnyja orhany ŭžo atrymali prava anulavać na terytoryi RF siertyfikaty i dekłaracyi, vydadzienyja ŭ inšych krainach Jeŭrazijskaha ekanamičnaha sajuza.
Raniej Rasija ŭžo ŭvodziła miery, jakija adchilajucca ad ahulnych pryncypaŭ Mytnaha sajuza. Naprykład, z 1 krasavika 2026 hoda płanujecca ŭzmacnić praviły ŭvozu aŭtamabilaŭ z krain JEAES. Novyja patrabavańni mohuć zakryć schiemu, kali mašyny ŭvozili ŭ Rasiju praź Biełaruś, Kyrhyzstan abo Kazachstan dla źnižeńnia mytnych płaciažoŭ.
Čytajcie taksama:
Biełarusa spynili na miažy z Rasijaj z karovinymi hałovami
Rasija pierakryvaje šlachi dla ŭvozu tannych mašyn praź Biełaruś