Hałoŭny pryz Bierlinale atrymała drama pra tureckuju paru «Žoŭtyja listy»
Stali viadomyja pieramožcy Bierlinskaha kinafiestyvalu.
Kadr ź filma «Žoŭtyja listy»
«Załatoha miadźviedzia» — hałoŭnuju ŭznaharodu — atrymaŭ niamiecki režysior tureckaha pachodžańnia Ilkier Čatak. U dramie «Žoŭtyja listy» aŭtar raspaviadaje historyju tureckaj pary z teatralnaha śvietu ŭ Ankary. Praz svaju palityčnuju pazicyju mastaki hublajuć pracu i apynajucca ŭ halečy — ich sprabujuć prymusić zamaŭčać, paviedamlaje Bild.
Film vielmi jasna havoryć «na palityčnaj movie tatalitaryzmu» i vyklikaje pałochajučaje pradčuvańnie mahčymaj palityčnaj budučyni i ŭ inšych krainach, skazaŭ staršynia žury Vim Vienders na cyrymonii ŭručeńnia ŭznaharod.
«Srebnaha miadźviedzia» za najlepšuju akciorskuju pracu ŭdastoiłasia aktrysa Sandra Chiuler — jana syhrała hałoŭnuju rolu ŭ histaryčnaj dramie «Roza»: rolu žančyny, jakaja ŭ XVII stahodździ vydaje siabie za mužčynu ŭ addalenaj niamieckaj vioscy.
Vialiki pryz žury atrymała trahiedyja «Kurtułuš» tureckaha režysiora Emina Ałpiera. Film stylistyčna nahadvaje viestern i raspaviadaje pra zabojčuju varožaść dźviuch sielskich supołak.
Adrazu dźvie ŭznaharody atrymaŭ film pra demiencyju «Karaleva la mora» amierykanskaha režysiora Łensa Chamiera — pryz žury i «Srebnaha miadźviedzia» za najlepšuju akciorskuju pracu druhoha płana.
Pryz za najlepšuju režysuru atrymaŭ brytaniec Hrant Džy — aŭtar filma pra džazavaha muzykanta «Usie ŭ zachapleńni ad Biła Evansa».
Kanadka Ženieŭjeŭ Dulud-de-Siel atrymała «Srebnaha miadźviedzia» za najlepšy scenaryj — ź filmam «Nina Roza».