Što ŭ realnaści adbyłosia pad Smalavičami? Voś samaja łahičnaja pryčyna nalotu ašalełych rasijskich małaletak
Analiz ścisłaj aficyjnaj infarmacyi i supastaŭleńnie drobnych detalaŭ dazvalaje zrabić bolš-mienš realistyčnuju vysnovu pra toje, što stała pryčynaj dramatyčnaj historyi ŭ Budahovie, dzie padletki-zamiežniki napali na pryvatny dom.
16 lutaha 2026 hoda troje rasijskich maładzionaŭ — adnamu 17 hadoŭ, astatnim pa 18 — na dośvitku ŭvarvalisia praz akno ŭ pryvatny dom u ahraharadku Budahova Smalavickaha rajona. Krajni da lesu, pa vulicy Soniečnaj.
Uzbrojenyja mietaličnymi bitami, pistaletam (imavierna — pnieŭmatyčnym, tamu što pierastrełka, pa słovach MUS, była, a spravy za zamach na žyćcio supracoŭnika niama) i nažami rasijanie žorstka źbili troch niemaładych ludziej, jakich znajšli ŭ domie.
Žančynie złamali ruku bitaj, mužčynam raśsiekli skuru na patylicach ručkami pistaletaŭ, adnamu złamali nos.
«Treba było źbić, pakalečyć, źniać na videa, my heta ŭsio za hrošy», — buduć potym tłumačyć nalotčyki.
Dzikunstva było spyniena naradam departamienta achovy, tamu što ŭ domie pa ščaślivym źbiehu abstavin była tryvožnaja knopka, jakuju paśpieŭ nacisnuć pabudžany sabakami haspadar.
Ale ci takaja ŭžo vypadkovaść toje, što ŭ domie była knopka? I ci vypadkova sonny haspadar pabieh uhladacca ŭ vokny, tolki pačuŭšy sabačy brech?
Možna padumać, što nie — haspadaru było čaho pieražyvać. Letam jamu ŭžo spalili mašynu.
15 žniŭnia 2025‑ha pry kancy pracoŭnaha dnia — a 17-j, — pažarnikam pastupiŭ sihnał ab uzharańni ŭ haražy, spałučanym z domam.
«Aŭtamabil u haražy zhareŭ całkam, razam ź im źniščanyja haraž i majomaść», — sucha paviedamili ŭ zvodcy biez paznačańnia pryčyn uzharańnia.
Dom, na jaki adbyŭsia nalot, u žniŭni 2025-ha. Fota: smolevichi-24.by
Vierahodna, haspadaroŭ u hety čas nie było doma, tamu što paśpieła vyhareć vialikaja płošča, čaho b nie adbyłosia, kali b jany adrazu paviedamili ratavalnikam pra pažar. Ci nie paśla hetaha vypadku jany pastavili tryvožnuju knopku?
Što tyčyca samoha scenaryju nalotu na toj ža dom 16 lutaha 2026 hoda, to jon da litary supadaje z praktykaj pakarańniaŭ narkašopami svaich «supracoŭnikaŭ», jakija pierastajuć vykonvać abaviazki narkazakładčykaŭ.
U čas pamiž naciskańniem tryvožnaj knopki i prybyćciom naradu nalotčyki paśpieli zaleźci pa drabinach u dom praz akno, adšukać troch čałaviek u vialikim domie, złamać ich supraciŭleńnie i nanieści surjoznyja traŭmy, zdymajučy ŭsio heta na videa. Narmatyŭ prybyćcia narada departamienta achovy — 7 chvilin. Čas vykliku milicyi viadomy — 04:17, ale MUS ni razu nie paviedamiła pra čas prybyćcia naradu. I navat padčyściła infarmacyju pra abjom atrymanych paškodžańniaŭ sa svajho pieršasnaha relizu. To što, spaźnilisia? Łukašenka potym zdymie hetaje tonkaje pytańnie z Kubrakova, pachvaliŭšy jaho, što toj asabista «prybyŭ raniej za chutkuju» — chacia heta niapraŭda. Na momant prybyćcia Kubrakova chutkaja ŭžo akazała dapamohu paciarpiełym. Fota: skryšnot ANT
Takich videazapisaŭ poŭna ŭ ciomnym siehmiencie sieciva: adčajnyja maładyja ludzi ŭ bałakłavach — na słenhu «sportyki», chłopcy spartyŭnaha vyhladu nibyta z 1990‑ch — łoviać zakładčykaŭ, jakich administracyja narkašopa padazraje ŭ kradziažy vydadzienych na realizacyju narkotykaŭ, a potym žorstka źbivajuć, časam navat vypadkova zabivajuć — u navuku inšym. Spravazdačy vykładajucca na śpiecyjalnych forumach. Vykanaŭcy dla takoj pracy šukajucca tam ža. Sam fakt źbićcia pry hetym nie vyzvalaje achviaru ad patreby adpracoŭvać naličany doŭh abo addavać jaho hrašyma.
Raźličvajecca, što takija achviary nie pojduć u orhany, tamu što im pryjdziecca raskazvać pryčyny atrymańnia paškodžańniaŭ — i, adpaviedna, sieści ŭ turmu za raspaŭsiud narkotykaŭ.
Heta ŭsio vielmi papularna ŭ Rasii, a ŭ Biełarusi takich praktyk amal nie zastałosia, tamu što pierałavili. Luby palitviazień raskaža, kolki takich «sportykaŭ» topčuć kałonii.
Što admietna, sudziać ich nie tolki za naniasieńnie cialesnych paškodžańniaŭ, ale i pa samaj ciažkoj 4‑j častcy artykuła 328. Ich dziejańni traktujuć jašče za prynaležnaść da narkakartela, jany atrymlivajuć ad 10 da 20 hod źniavoleńnia. Takija zachady davoli paśpiachova praradzili miascovych, zdolnych na taki hvałt, ale voś dla rasijskich vykanaŭcaŭ Biełaruś — ciomny les. Tamu takija znajšlisia.
Jak ža nalotčyki viedajuć adrasy? Ich im vydajuć narkašopy: fota pašparta sa staronkami prapiski — heta vielmi častaje patrabavańnie pry «ŭładkavańni» zakładčykam. Potym pa hetych adrasach rabotnikaŭ i šukajuć.
Jašče adzin dokaz takoj viersii — heta džentlmienski nabor, jaki mieli pry sabie rasijanie.
Pistalet, palčatki, ček ab arendzie karšerynha, nož, elektronnaja cyhareta, kašalok z kartaj rasijskaha banka, vokładka dakumienta, telefon i kałoda kart. Znojdziena ŭ zatrymanych. Fota: Śledčy kamitet
Admietnaja detal u im — heta kałoda kart «888».
Možna, kaniečnie, dapuścić, što małaletki bavili siabie składanymi kartačnymi hulniami («888» — heta vialikaja pokiernaja kałoda na 54 karty). Ale bolš imavierna, što adnu z takich kart jany źbiralisia pakinuć na miescy złačynstva jak signature — mietku, jakaja adsyłaje da zamoŭcy. Takaja praktyka isnuje, jana papularnaja ŭ małaletnich kryminalnikaŭ.
Try vaśmiorki — heta nazva bujnoha narkašopa, jaki pracuje ŭ Rasii minimum z 2024 hoda.
Baner nielehalnaj kramy na samym papularnym rasijskim resursie darkneta dla handlu narkotykami
U kamientarach da hetaha narkašopa narkamany rehularna skardziacca na «nieznachody» i «pustyja kłady» — kožny taki vypadak, pa sutnaści, tryhier dla razborak z zakładčykam.
Naŭrad ci niechta z paciarpiełych handluje narkotykami ŭ Rasii. Ich sacyjalnyja partrety nie pasujuć pad takuju aktyŭnaść. Haspadar doma ŭvohule muzyka, jaki ciapier šukaje cichija piensijanierskija padpracoŭki kštałtu pracy achoŭnikam.
Možna było b jašče razhladać viersiju taho, što rasijanie chacieli niešta skraści z hetaha doma. Chacia pa apublikavanych interjerach jasna, što žyvie siamja paciarpiełych vielmi ścipła.
Moža, rasijskija nalotčyki išli da kahości inšaha, ale pramachnulisia adrasam?
Ale ciapier i hetyja viersii adpadajuć. Voś što paciarpieły abciakalna kaža ŭ repartažy ANT:
«Heta zamova dla cisku na inšaha čałavieka, ja nie budu kazać kaho, ale heta naš blizki svajak, znachodzicca za miažoj».
Što heta za blizki svajak, dziela jakoha z Rasii jechali «sportyki»? Syn? Plamieńnik? Unuk? Nie tak važna, z hetym ciapier budzie raźbiracca milicyja. Mahčyma, što kryminalny pieraśled budzie čakać nie tolki rasijskich małaletak-nalotčykaŭ, ale i jaho.