Vaniu Ściacenku z Hrodna narešcie ŭviali daraženny preparat
Biełarusu Vaniu Ściacenku, na lačeńnie jakoha źbirali hrošy ŭsioj krainaj, narešcie ŭviali preparat «Elevidzis» koštam 2,9 miljona dalaraŭ. Pra heta paviedamiła maci chłopčyka ŭ sacyjalnych sietkach. Jana padziakavała ŭsim, chto padtrymlivaŭ siamju i ŭdzielničaŭ u zbory srodkaŭ.
Skrynšot ź videa
Zbor hrošaj zaviaršyŭsia jašče 1 śniežnia 2025 hoda, ale leki ŭdałosia ŭvieści tolki praz amal try miesiacy. Ciapier Vaniu čakaje kurs reabilitacyi.
Pra chłopčyka stała viadoma na ŭsiu krainu ŭ listapadzie 2025 hoda, kali vybuchnuŭ skandał vakoł zatrymańnia dvuch błohieraŭ z Hrodna — 17‑hadovaha Michaiła Drahuna i jaho 37‑hadovaj siabroŭki Jaŭhienii Tarasienki. Jany pravodzili rozyhryšy z darahimi pryzami i abiacali častku sabranych srodkaŭ pieraličyć na lačeńnie Vani.
Udzielnikam prapanoŭvali kupić numar dla ŭdziełu ŭ nibyta dabračynnaj łatarei, abiacajučy smartfony abo navat aŭtamabili. Adnak z prykładna paŭtara miljona rubloŭ, jak śćviardžajecca, siamji pieradali tolki častku sumy, a značnyja srodki pajšli na pryzy i asabistyja vydatki błohieraŭ.
Michaił Drahun paśla vyzvaleńnia pad padpisku ab niavyjeździe zajaŭlaŭ, što nie ličyć siabie vinavatym, i tłumačyŭ, što ad pačatku kazaŭ pra pieradaču tolki častki sabranych hrošaj. Sud pa hetaj kryminalnaj spravie jašče napieradzie, abvinavačanym moža pahražać da 12 hadoŭ pazbaŭleńnia voli.
Niahledziačy na skandał, zbor srodkaŭ na lačeńnie Vani byŭ zakryty, i ciapier chłopčyk atrymaŭ nieabchodny preparat.
Čytajcie taksama:
17‑hadovaha hrodzienskaha błohiera znoŭ zatrymali, užo pa novaj spravie za paklop
Siamja Vani Ściacenki źbirajecca jechać u kliniku ŭ Dubaj. Hrošy ŭžo ŭsie pryjšli