«Ja nie prysvojvaŭ sabie miljon». 17‑hadovy błohier z Hrodna, jaki źbiraŭ hrošy na lačeńnie dziciaci, raspaviadaje svaju viersiju

«Baćki pra ŭsio daviedalisia z navin»

4 listapada stała viadoma pra zatrymańnie viadomych hrodzienskich błohieraŭ, jakija pravodzili interaktyvy ŭ Instagram u padtrymku ciažka chvoraha chłopčyka Vani Ściacenki. Abodva błohiery stali fihurantami kryminalnaj spravy ab machlarstvie. Ich padazrajuć u tym, što častka sabranych na lačeńnie chłopčyka hrošaj była imi prysvojena. Havorka išła jak minimum pra miljon rubloŭ. Paśla troch sutak zatrymańnia błohieraŭ adpuścili. Žurnalistam Onliner.by udałosia asabista pahavaryć ź Michaiłam.

Chłopcu 17 hadoŭ, jon vyras u poŭnaj siamji, sa starejšymi bratam i siastroj.

— Ja zaŭsiody adroźnivaŭsia ad adnahodkaŭ, mnie ŭsie zaŭsiody zajzdrościli. Skončyŭ 11 kłasaŭ — i na hetym usio. Zrazumieŭ, što treba rabić toje, što padabajecca, tamu i pajšoŭ u błoh. Mnie nie važny byŭ zarobak, važna było, kab ludzi pra mianie daviedalisia. I, dumaju, u mianie heta atrymałasia.

Pa słovach maładoha čałavieka, błoh jon pačaŭ vieści dva hady tamu, kali jamu było 15. U sakaviku 2024 hoda jon paznajomiŭsia ź Jaŭhienijaj, užo viadomym hrodzienskim błohieram z paŭmiljonam padpisčykaŭ.

 — Śpisalisia ź joj praz Instagram, ja spytaŭ košt rekłamy ŭ jaje kanale i kupiŭ. Paśla śpisalisia pa niejkich ahulnych intaresach, sustrelisia i schadzili na kavu. My zrazumieli, što ŭ nas jość ahulnyja biznes-intaresy, jość budučynia ŭ płanie błoha. Spačatku prosta razmaŭlali, a potym užo stała ŭsio pierachodzić u bolš ščylnyja adnosiny prosta tamu, što ŭ niejki momant stała vielmi šmat u maim žyćci.

 — Baćki viedali pra vašyja adnosiny?

 — Zdahadvalisia i admoŭna stavilisia da taho momantu, pakul Je. nie raźviałasia. Paśla stali stavicca stanoŭča. Kolki hadoŭ roźnicy pamiž nami, baćkam było nie važna, tamu što takaja ž situacyja i ŭ ich samich: tata starejšy za mamu na 22 hady. Hałoŭnaje, kab mnie było dobra.

 — Jak vy pryjšli da interaktyvaŭ u padtrymku Vani Ściecenki?

— Ja i raniej pastajanna ŭkładvaŭ u raźvićcio svajho błoha: kuplaŭ hivy, rekłamu, zdymaŭ roliki. Uletku 2025 hoda daviedaŭsia, što na prastorach internetu vielmi mocna forsicca historyja Ivana. U mianie ž była aŭdytoryja, jakaja lubić padarunki, pakolki tematyka błoha była takaja. Vani ja i da hetaha dapamahaŭ biez hetych interaktyvaŭ — usie pra heta vydatna viedali. Tady vyrašyŭ spytać u mamy Vani, ci možna takoje zrabić, tamu što dumaŭ, što heta pryniasie niejki vialiki plus. Jana pahadziłasia. Niejkich kankretnych ličbaŭ ja sam nie viedaŭ i joj nie nazyvaŭ, tamu što heta zaležała nie ad mianie, a ad udzielnikaŭ. Jana dała dabro, my pasprabavali, i ŭ nas atrymałasia.

Pavialičyć

 — U čym była sutnaść interaktyvaŭ?

— Udzielnikam pradavalisia numarki. Adzin numarok — 10 rubloŭ. Čałaviek skidvaŭ [hrošy na kartu] i mieŭ šaniec vyjhrać «ajfon», mašynu (u zaležnaści ad taho, što razyhryvałasia). Heta była nie stopracentnaja dabračynnaja akcyja ŭ dapamohu Vaniu: ja razyhryvaŭ ajfon i prosta častku hrošaj z usiaho addavaŭ Vani. Słova «častka» nie vyznačajecca jak pracent niejki, ja nidzie nie nazyvaŭ niejkich pracentaŭ. I ŭžo paśla sam vyrašaŭ, kudy kolki pojdzie (u siužecie MUS prahučała fraza «daj boh uziaŭ sabie 1%»).

Pavialičyć

U padtrymku Vani Ściacenki, sa słoŭ M., było praviedziena siem paŭnavartasnych interaktyvaŭ.

 — Abarot [hrošaj] byŭ prykładna toj, što jany [MUS] kažuć: 1,5 młn rubloŭ (sa žniŭnia pa listapad było pradadziena 150 tysiač numarkoŭ), ale vydatki jany čamuści nie ličać.

— Kolki za hety pieryjad vy razyhrali padarunkaŭ dla ŭdzielnikaŭ?

 — Ja padličyŭ, što vydatki na padarunki skłali prykładna $400 tysiač, što ekvivalentna krychu bolš za miljon biełaruskich rubloŭ. Ja voś tak voś naličyŭ, što miljon pajšoŭ tolki na padarunki. Viadoma, niejkuju častku, ja hetaha nie chavaŭ, pakinuŭ sabie i niejkuju Vani pieravodziŭ albo naŭprost, albo hatoŭkaj uručaŭ.

«Razyhrali štuk 200 «ajfonaŭ» i dzieviać mašyn»

 — Možacie nazvać sumu, jakuju vy pakinuli sabie z hetych interaktyvaŭ?

 — 20 tysiač dalaraŭ.

— Chto apłačvaŭ pajezdki ŭ Dubaj i na Maldyvy?

— Niešta apłačvała Jaŭhienija, niešta ja. Maldyvy byli pa častkovym bartery, i častka hrošaj była ŭ mianie i ŭ jaje. U Dubaj, nie chavaju, źlatali za hrošy interaktyvu. Na dvaich my patracili $3 tysiačy.

— Kolki «ajfonaŭ» razyhrali i mašyn?

— Ja dumaju, prykładna štuk dźvieście, pačynajučy ad iPhone 16 i zakančvajučy iPhone 17 Pro Max. Apošniaja mašyna, jakuju my razyhryvali, była dziaviataja pa liku.

— Vy realna daryli mašyny?

— Tak. Usie pieramožcy, jakija byli vyznačany ŭ pramym efiry, atrymlivali svaje mašyny da pary da času, pakul nie błakiravalisia karty. Patłumaču: ź dzieviaci mašyn zaraz addadziena tolki piać. Heta značyć, piać uładalnikaŭ jeździać na svaich mašynach. Jašče čatyry (hetyja hrošy jość, prosta jany zabłakiravany) — ja vielmi sumniavajusia, što jany atrymajuć svaje aŭtamabili.

 — Kali i čamu błakiravalisia hrošy?

— Hrošy błakiravalisia bankami z-za taho, što pastupali na karty ŭ takim abjomie. Patłumaču: pierš čym pieravieści hrošy z numara MTS na rachunak aŭtasałona za mašynu, treba było zapytvać dazvoł u milicyi, na što była dadziena admova. Nam skazali, što my možam tolki ŭsiu sumu pieravieści na dabračynny rachunak.

— Pra jakuju sumu idzie havorka?

 — Pra 170 tysiač rubloŭ, jakimi my chacieli apłacić try mašyny Belgee (ich ja razyhryvaŭ u kastryčniku). 

— A da hetaha vam uchvalali padobnyja dziejańni?

— Raniej my prosta zdymali hrošy z karty i zachoŭvali ich doma, kab apłacić z hetych hrošaj aŭtamabili. A ŭ kastryčniku vyrašyli častku srodkaŭ pieravieści na rachunak Vani, a častku na rachunak aŭtasałona, kab apłacić mašyny.

 — Čamu, jak dumajecie, na vas źviarnuli ŭvahu?

 — Nie viedaju, ščyra.

 — Možacie raskazać pra dzień zatrymańnia?

— My ź Je. jechali ŭ milicyju, kab napisać zajavu na maju znajomuju, u jakoj na karcie byli 68 tysiač rubloŭ z našaha interaktyvu. Jana čamuści pieražyvała i nie chacieła pieravodzić hrošy naŭprost Vani na dabračynny rachunak, choć ja joj usio tłumačyŭ. Ja sprabavaŭ kožny dzień vyjści ź joj na suviaź i atrymlivaŭ ihnor. I ciarpieńnie jak by ŭsio, skončyłasia: zbor chutka pavinien byŭ zakrycca, i hetyja 68 tysiač byli b da miesca, tamu što heta nie maje hrošy i nie jaje.

Kali nas spynili supracoŭniki DAI, ja spačatku padumaŭ, što heta prank ad Je. Paśla mianie zatrymali, pasadzili ŭ bus i pavieźli. Ja da apošniaha nie viedaŭ, što i jaje taksama zatrymali.

Dumaju, Je. zaraz znachodzicca ŭ šoku. Kali jość niejkaja vina, to jaje tam 1 pracent, usie astatnija 99 — maje. Mnie ŭvohule niezrazumieła było, čamu jaje zatrymali, kali pravodziłasia z maich ruk, a jana prosta była jak błohier, jaki raspaviadaŭ pra mianie ŭ vyhladzie rekłamy.

— Čamu vy vykarystoŭvali karty siabroŭ?

 — Tamu što banki stavili abmiežavańni na maje karty. U mianie nie zastavałasia vychadu, tamu što išoŭ interaktyŭ, ja nie moh usio spynić, i ludziam nie było b kudy dasyłać svaje hrošy. I ja choć jakiści sposab znajšoŭ: prasiŭ pa čarzie siabroŭ i znajomych davać svaje karty.

«Kvateru jana kupiła jašče da interaktyvu»

— U kadry apieratyŭnaj zdymki trapili hatovyja hrošy ŭ kvatery, «ajfony», mašyna za $170 tysiač, novaja kvatera. Možacie raskazać padrabiaźniej pra heta?

— Častka hrošaj i ajfonaŭ, što lažała doma, — heta hrošy i telefony pieramožcaŭ, jakija jašče nie paśpieli vydać. Heta značyć užo byli viadomyja ŭładalniki hetych hrošaj i telefonaŭ, jakija ja pavinien byŭ pieravieści ci adpravić poštaj. Na rachunkach u mianie hrošy zaraz lažać na apłatu mašyn pieramožcaŭ, i ja chaču jašče pieravieści Vani. Ale pakul jany [rachunki] zabłakiravany.

Što da kvatery, to ja jaje zdymaŭ za paŭtary tysiačy, i mianie adtul vyhnali. Mašyna BMW — nie maja i nie Je. i nie kaštuje stolki, kolki tam pakazali. Ja viedaju, čyja heta mašyna, ale nie chaču pra heta havaryć. Jaje taksama kanfiskavali, choć, paŭtarusia, jana nijakaha dačynieńnia da nas nie maje.

 — A kvatera ŭ elitnym domie?

— Je. kupiła kvateru jašče da pačatku interaktyvu, jak i mašynu. Ale ŭ jaje ŭvohule kanfiskavali ŭsio i zabłakiravali ŭsie rachunki, pakul jana nie dakaža svaju racyju.

 — Što zaraz ź Jaŭhienijaj?

— Jana na voli, ź joj usio dobra, ale ja nie mahu kazać, dzie jana. My razam ź joj vychodzili ź izalatara, i ŭ jaje svoj punkt hledžańnia, a ŭ mianie svoj na toje, jak być dalej. Ja liču, što nie artykuł «Machlarstva» [pavinien prymianiacca], a zusim inšy artykuł, za jaki štraf da 500 bazavych, tamu što heta byŭ rozyhryš dla zarehistravanych [udzielnikaŭ] i prosta [mohuć dać] štraf za toje, što nie licenzavany hety rozyhryš.

— Jak vašy baćki pastavilisia da taho, što z vami zdaryłasia?

— Jany mianie całkam padtrymlivajuć, nie vierać tamu, što pišuć u internecie. Jany naohuł tolki ŭviečary z navin daviedalisia, što mianie zatrymali.

 — Hetaja historyja niejak paŭpłyvała na vašyja ź Je. adnosiny?

— U jaje była dzieści kryŭda na toje, što jana, jak žančyna i jak mama, praviała troje sutak u izalatary. Pa-pieršaje, heta było niečakana, i spačatku, ja ŭžo kazaŭ, dumaŭ, što zatrymali tolki mianie. U Je., viadoma, nie taki punkt hledžańnia, ale ja vyjšaŭ na suviaź ź ludźmi, kab pakazać i raskazać [jak usio było na samoj spravie]…

— Na jakich umovach vas adpuścili?

— Pad padpisku ab niavyjeździe da suda.

• 2
• 0
• 2
• 7
• 0
• 0
• 2
• 0