Na vajskovyja zbory masava zabirajuć hrodziencaŭ. A što minčuki? Padrychtujciesia, vaša čarha — 2027‑2028 hady

Adnoj z admietnaściej pravierki bajavoj hatoŭnaści Uzbrojenych Sił Biełarusi ŭ hetym hodzie stała razhortvańnie 6‑j miechanizavanaj bryhady da štataŭ vajennaha času. Pavodle słoŭ ministra abarony Viktara Chrenina, raniej anałahičnuju pravierku prajšli jašče dźvie bryhady. Usiaho ŭ Biełarusi čatyry miechanizavanyja bryhady, tamu adkaz na pytańnie, chto budzie nastupnym, vyhladaje vidavočnym.

Fota ilustracyjnaje

Padčas razmovy z Alaksandram Łukašenkam na 227‑m palihonie Paŭnočna-Zachodniaha apieratyŭnaha kamandavańnia ministr abarony Viktar Chrenin adznačyŭ, što 6‑ia miechanizavanaja bryhada pryviedziena ŭ «pavyšanuju bajavuju hatoŭnaść».

«Bryhada ŭ takim abjomie, jak ciapier zapłanavana pravierka, jašče ni razu nie praviarałasia. Bryhada budzie całkam mabilizavana da štataŭ vajennaha času. Na siońniašni momant pryzvanyja vajennaabaviazanyja zapasu ŭ połk reziervu Zachodniaha apieratyŭnaha kamandavańnia, jaki pryznačany dla adnaŭleńnia strat», — davodziŭ ministr Łukašenku.

Pravierki z razhortvańniem cełaj bryhady da štataŭ vajennaha času — adnosna novaja praktyka dla Biełarusi. Pavodle słoŭ ministra, raniej padobnyja pravierki prajšli ŭ dvuch inšych bryhadach:

«U adpaviednaści z novaj mietodykaj, zychodziačy z vopytu i prablemnych pytańniaŭ, jakija my vyjavili ŭ chodzie pravierak 19‑j bryhady, 11‑j bryhady, my ŭbačyli, što nieabchodny apieradžalny pryzyŭ aficeraŭ zapasu i praviadzieńnie ź imi zaniatkaŭ, kab jany byli hatovyja da vykanańnia svaich zadač».

Chrenin taksama paviedamiŭ, što da pačatku poŭnaj pravierki bajavoj hatoŭnaści było pryzvana 400 aficeraŭ zapasu.

Upieršyniu pryviadzieńnie cełaj miechanizavanaj bryhady ŭ «poŭnuju» bajavuju hatoŭnaść adbyłosia ŭ 2023 hodzie. Heta była 11‑ia miechanizavanaja bryhada, jakaja dysłakujecca ŭ Słonimie.

Jak u toj hod paviedamlaŭ kamandzir bryhady pałkoŭnik Siarhiej Šylin, zadača zaklučałasia ŭ praviercy zdolnaści złučeńnia pierajści na bajavuju stupień hatoŭnaści, ažyćciavić mabilizacyju vajennasłužačych zapasu, dakamplektavacca adpaviednymi ŭzbrajeńniem, vajennaj i śpiecyjalnaj technikaj, ździejśnić marš u rajony vykanańnia zadač z praviadzieńniem taktyčnaha vučeńnia.

U tym hodzie dakamplektavańnie asabovaha składu z zapasu pravodziłasia praz vajennyja kamisaryjaty Bresckaj i Hrodzienskaj abłaściej.

Chrenin tady adznačaŭ, što pravierka ŭ takim maštabie pravodzicca ŭpieršyniu i što ŭ jaje miežach «niama nijakich abmiežavańniaŭ». Pry hetym «bryhada pavialičanaja da štatu vajennaha času, a heta 6 tysiač čałaviek». Analityki aceńvali kolkaść nabranych prykładna na 4 tysiačy čałaviek.

Ministr nie nazvaŭ kolkaść asabovaha składu bryhady ŭ mirny čas. U adkrytych krynicach takoj infarmacyi niama. Pavodle niekatorych acenak, jana moža składać da pałovy ad kolkaści, praduhledžanaj štatami vajennaha času.

Kali ŭ 2024 hodzie anałahičnaja pravierka achapiła 19‑iu miechanizavanuju bryhadu, jakaja dysłakujecca ŭ Zasłonavie (Lepielski rajon Viciebskaj vobłaści), Ministerstva abarony paviedamlała, što z zapasu było pryzvana bolš za 3000 vajennaabaviazanych, i adznačała, što hetaj kolkaści moža być dastatkova dla razhortvańnia miechanizavanaj bryhady da štataŭ vajennaha času.

Suchaputnyja vojski i Siły śpiecyjalnych apieracyj na karcie Biełarusi. Krynica: Wikimadia Commons

Varta adznačyć, što padčas pravierak bajavoj hatoŭnaści, akramia miechanizavanych bryhad, paralelna razhortvajucca i inšyja padraździaleńni (naprykład, bataljony). Adnak całkam da štataŭ vajennaha času, jak praviła, davodziać tolki adnu bryhadu.

U suviazi z tym, što ŭ Biełarusi ŭsiaho čatyry miechanizavanyja bryhady, možna mierkavać, što ŭ 2027 ci 2028 hodzie anałahičnuju pravierku moža prajści 120‑ia miechanizavanaja bryhada (Minsk), jakaja pakul zastajecca apošniaj.

Kamientary da artykuła