Litoŭskija kansiervatary dabivajucca abmiežavańnia prava biełarusaŭ na nabyćcio nieruchomaści ŭ Litvie

Litoŭskija kansiervatary prapanujuć abmiežavać nabyćcio nieruchomaści ŭ Litvie dla hramadzian Biełarusi i Rasii. Z takoj inicyjatyvaj u Siejmie vystupili pradstaŭniki apazicyjnaj partyi «Sajuz Ajčyny — Chryścijanskija demakraty Litvy». Jany prapanujuć unieści papraŭki ŭ zakon ab abmiežavalnych mierach, pryniatych u suviazi z vajnoj va Ukrainie, piša Delfi.lt.

Vilnia. Zdymak ilustracyjny. Fota: «Naša Niva»

Pavodle prajekta kansiervataraŭ, hramadzianam Biełarusi i Rasii płanujuć zabaranić kuplać nieruchomaść pobač z vajskovymi palihonami i inšymi stratehična važnymi abjektami. Akramia taho, prapanujecca ŭvieści bolš strohija praviły: kali źmieny buduć uchvalenyja, prava nabyvać nieruchomaść zastaniecca tolki ŭ tych hramadzian Biełarusi i Rasii, jakija majuć pastajanny dazvoł na žycharstva ŭ Litvie. Asoby z časovym dazvołam na žycharstva takoj mahčymaści mieć nie buduć.

Taksama prapanujecca, kab navat uładalniki pastajannaha dazvołu na žycharstva mahli nabyvać nieruchomaść kala stratehičnych abjektaŭ tolki paśla atrymańnia dazvołu ad litoŭskich ustanoŭ. Inicyjatary ličać, što takaja majomaść moža być vykarystanaja ŭ varožych metach.

Pavodle danych litoŭskaha Centra rehistraŭ, u 2022—2024 hadach hramadzianie Biełarusi nabyli 1834 abjekty, ź jakich 1152 znachodziacca ŭ 10‑kiłamietrovaj zonie ad stratehičnych abjektaŭ; 556 pakupnikoŭ mieli časovy dazvoł na žycharstva. Za toj ža pieryjad hramadzianie Rasii nabyli ŭ Litvie 2814 abjektaŭ nieruchomaści. Ź ich 1845 čałaviek nabyli majomaść u miežach 10 kiłamietraŭ ad važnych infrastrukturnych abjektaŭ, u tym liku 364 — majučy tolki časovy dazvoł na žycharstva.

Aŭtary inicyjatyvy śćviardžajuć, što hramadzianie Biełarusi i Rasii davoli aktyŭna nabyvajuć nieruchomaść kala važnych abjektaŭ, tamu Litvie varta ŭzmacnić kantrol. Padobnuju prapanovu kansiervatary ŭžo ŭnosili hod tamu, ale tady jana nie atrymała padtrymki. Ciapier jany płanujuć znoŭ pradstavić dapracavany prajekt padčas viasnovaj siesii Siejma, jakaja pačniecca 10 sakavika.

Kamientary da artykuła