Litva aficyjna źviarnułasia ŭ ICAO ŭ suviazi ź biełaruskimi kantrabandnymi šarami
Litva padała dokazy ŭ Mižnarodnuju arhanizacyju cyvilnaj avijacyi (ICAO) pra incydenty, vyklikanyja kantrabandnymi pavietranymi šarami, jakija zapuskalisia z terytoryi Biełarusi, paviedamlaje vydańnie vz.lt.
Premjer-ministarka Litvy Inha Ruhinienie paviedamiła, što heta nie adzinkavyja vypadki, a paŭtaralnyja dziejańni, jakija stvarajuć ryzyku dla cyvilnaj avijacyi i mižnarodnaj avijacyjnaj biaśpieki. Litva čakaje ad ICAO vyraznaj acenki situacyi i pryncypovaha reahavańnia.
Ministr transpartu Litvy Juras Taminskas adznačyŭ, što jość prykmiety taho, što ICAO moža pryznać hetyja dziejańni Biełaruśsiu jak hibrydnuju ataku. Heta nibyta moža stać vialikim palityčnym udaram dla režymu Alaksandra Łukašenki, jaki sprabuje pakazać siabie adkrytym dla mižnarodnaha supracoŭnictva, choć faktyčna ŭchilajecca ad pryznańnia parušeńniaŭ mižnarodnaha avijacyjnaha prava.
Litoŭski ministr taksama adznačyŭ, što heta moža dapamahčy pry mahčymym uviadzieńni dadatkovych sankcyj suprać Minska, bo aficyjnaje pryznańnie ICAO padkreślić parušeńni mižnarodnaha prava.
Źviestki pra incydenty źbirajucca z kastryčnika minułaha hoda. Pavodle źviestak Ministerstva transpartu Litvy, z hetaha času adbyłosia jak minimum 16 parušeńniaŭ pavietranaj prastory, jakija zakranuli bolš za 370 rejsaŭ i kala 53 000 pasažyraŭ, a ahulnyja straty pieravyšajuć 2,3 miljona jeŭra.
U suviazi z pahrozaj kantrabandnych šaroŭ finskaja avijakampanija Finnair admianiła viačerni rejs pamiž Vilniaj i Chielsinki ŭ minułym śniežni, ale Juras Taminskas paviedamiŭ, što rejs adnovicca z 1 sakavika.
U siaredzinie śniežnia 2025 hoda litoŭski ŭrad abjaviŭ nadzvyčajnuju situacyju z-za kantrabandnych pavietranych šaroŭ, jakija pieraškadžali pracy aeraportaŭ i stvarali ryzyku dla cyvilnaj avijacyi. Raniej, u kastryčniku, była časova zakrytaja miaža ź Biełaruśsiu.
Ad minułaj vosieni słužby Litvy pravieryli kala 50 000 čałaviek, 38 000 aŭtamabilaŭ, kanfiskavali kala 100 šaroŭ i znajšli 234 000 pakietaŭ cyharet. Źnižeńnie kolkaści incydentaŭ u siaredzinie śniežnia źviazvajuć ź vizitam pradstaŭnika prezidenta ZŠA Džona Koŭła ŭ Biełaruś, paśla jakoha Łukašenka abiacaŭ spynić zapusk kantrabandnych pavietranych šaroŭ.
Litoŭskija ŭłady ličać hetyja zaloty šaroŭ hibrydnaj atakoj z boku Minska.
«Dekałanizacyja — heta pryjści i zaniać svajo miesca». Nasta Rahatko budzie ŭdzielničać u fiestyvali rasijskaj knihi. Sulima jaje asudziŭ, jana nie zmaŭčała ŭ adkaz5858
Kamientary