Niečakanyja spałučeńni koleraŭ u mužčynskaj modzie hetaj viasnoj
Zamiest zvykłaj palitry šerych, čornych i ciomna-sinich koleraŭ dyzajniery prapanujuć mužčynam kantrasnyja kambinacyi.
Kalekcyja viasna—leta 2026 japonskaha modnaha brenda Kolor, pradstaŭlenaja na Tydni mody ŭ Paryžy. Fota: Kolor
Jak piša Le Monde, śmiełyja kalarovyja spałučeńni vyłučajuć mužčynskija kalekcyi viasny i leta 2026 hoda. Sutnaść prostaja: jarkija, dysanansnyja kantrasty, vartyja karobki z ałoŭkami. Pry hetym havorka idzie pra dva ŭzroŭni śmiełaści: maksimalny — kali spałučajucca kolery, jakija raniej ciažka było ŭjavić razam navat vypadkova, i bolš strymany — z pastelnymi akcentami dla aściarožnych.
Kalekcyja Dunhill viasna—leta 2026. Fota: Paul Smith
Pry hetym fasony zastajucca kłasičnymi i zrazumiełymi — pinžaki, kaściumy, kašuli, skuranyja kurtki. Źmianiajecca mienavita palitra. Naprykład, žoŭtaja kurtka moža spałučacca z ružovym śvitaram, a jarka-siniuju kašulu moža dapoŭnić zialony pinžak. Forma zastajecca tradycyjnaj, ale koler robić vobraz bolš žyvym.
Kalekcyja Dior viasna—leta 2026. Fota: Dior
Takim čynam dyzajniery abnaŭlajuć kłasičny mužčynski harderob bieź źmieny jaho asnovy. Zamiest taho, kab ekśpierymientavać z kanstrukcyjaj, jany pracujuć z koleram.
Jość i jašče adzin faktar. Sučasnaja moda isnuje ŭ ličbavaj prastory — u Instagram i TikTok. Jarkija kalarovyja błoki lepš vyhladajuć na fota i videa, chutčej pryciahvajuć uvahu i vyłučajucca ŭ stužcy. U hetym sensie kantrasnyja spałučeńni — heta jašče i sposab być zaŭvažanym.
Pakaz kalekcyi Celine viasna—leta 2026 u Paryžy. Fota: Celine
Na fonie rynku, dzie doŭhi čas daminavali niejtralnyja bazavyja rečy, koler stanovicca srodkam indyvidualnaści. Zamiest univiersalnaj «biaśpiečnaj» hamy prapanujecca vyraznaść i charaktar.
Kalekcyja Prada viasna—leta 2026. Fota: Prada
Hety trend maje i bolš šyrokaje značeńnie. U toj čas jak u hramadstvie i ŭ internecie nabirajuć moc ruchi, jakija nastojvajuć na žorstkim i vuzkim razumieńni «sapraŭdnaj mužčynskaści», niekatoryja dyzajniery prapanujuć inšy naratyŭ — pra indyvidualnaść, raznastajnaść i svabodu stylu.