Na mižnarodnym teatralnym fiestyvali ŭ Mahilovie amal usie pastanoŭki buduć z Rasii
U svoj čas adzin z najmacniejšych mižnarodnych teatralnych fiestyvalaŭ Biełarusi ŭ hetym hodzie ciahnie chiba što na status «sajuznaha».
Sioletni mahiloŭski fiestyval projdzie z 20 pa 27 sakavika. U anonsie zavablivajuć tym, što hledačoŭ čakaje «17 mahutnych pastanovak ź Biełarusi, Kazachstana i Rasii».
Pa fakcie z Rasii śpiektaklaŭ budzie bolš za ŭsio, a z Kazachstana zajaŭleny tolki adzin. Dy i pryjedzie da nas Dramatyčny teatr imia Dastajeŭskaha z horada Siamiej z čechaŭskimi vadevilami.
Afiša Mart-kantakta-2026. Krynica: mdrama.by
Teatry z Rasii taksama niaroŭna dychajuć da Čechava, tamu hledačoŭ čakaje i «Čajka», i «Dama z sabačkam». A jašče, naprykład puškinskaja «Pikavaja dama» i «Jaŭhien Aniehin». Darečy, pry žadańni smalenskuju «Pikavuju damu» možna budzie paraŭnać z varyjantam bačańnia z Hrodna — abiedźvie pastanoŭki z uzrostavym cenzam 16+, ale zamiežnaja kaštuje bolš.
Nie abydziecca i biez vajskovaj temy — za heta najpierš adkaznyja hości z Uljanaŭska z pastanoŭkaj «Zaŭtra była vajna». Relihijnuju ž tematyku padymie Uładzimirski teatr dramy — tut vam i ikony, i duchoŭnaje praśviatleńnie na bazie apoviedaŭ ruskaha piśmieńnika Uładzimira Sałavuchina.
Sapraŭdnaj piarlinaj festu možna ličyć pryvoz «Chutara» Biełaruskaha teatra lalek, pastaŭlenaha režysioram Jaŭhienam Karniaham pa «Znaku biady» Vasila Bykava. U Minsku ŭ hety teatr prabicca zaŭsiody niaprosta, tamu heta cudoŭnaja mahčymaść dla niekatorych žycharoŭ Mahilova pabačyć śpiektakl raniej za minčukoŭ.
Cana fiestyvalnych kvitkoŭ startuje ad 25 rubloŭ.