Žančyna naradziła dzicia ŭ sielskaj prybiralni — i jano patanuła. SK ahučyŭ padrabiaznaści
Vypadak adbyŭsia ŭ 2022 hodzie ŭ vioscy Chatola Viciebskaha rajona.
Ilustracyjnaje fota
Miascovaja žycharka naradziła ŭ prybiralni dziaŭčynku — taja ŭpała ŭ vyhrabnuju jamu i nie padavała prykmiet žyćcia. Śledčy kamitet padzialiŭsia padrabiaznaściami hetaj hučnaj spravy, piša hazieta «Vićbičy».
U žniŭni 2022 hoda ŭ chutkuju dapamohu patelefanavaŭ žychar vioski Chatoli i raskazaŭ: jaho sužycielka naradziła małoje prosta ŭ prybiralni, i dziaŭčynka ŭpała ŭ vyhrabnuju jamu. Miedyki, jakija pryjechali na miesca, byli šakavanyja ŭbačanym: u jamie byŭ trup novanarodžanaj.
— Padčas dopytu mužčyna kazaŭ, što ranicaj jaho siabroŭka pračnułasia i pačała skardzicca na boli ŭ žyvacie. Jana viedała, što ciažarnaja, ale na ŭlik u žanočuju kansultacyju nie stanaviłasia.
Pra svoj stan jana daviedałasia, jašče kali była na zarobkach u Rasii. Tam zrabiła UHD, pastavili termin ciažarnaści 17—18 tydniaŭ, pierakanałasia, što płod narmalny, — uspaminaje staršy śledčy adździeła pa rasśledavańni złačynstvaŭ suprać asoby i hramadskaj biaśpieki SU USK pa Viciebskaj vobłaści Anastasija Jałtušenka. — Viarnuŭšysia dadomu, rychtavacca da budučych rodaŭ 39‑hadovaja žančyna nie śpiašałasia. Rehularna navat na poźnich terminach zajmałasia ciažkaj fizičnaj pracaj i bieśpierapynna piła ałkahol. Na dopycie jana raskazała, što narodžanaje dzicia nie kryčała, tamu jana spakojna pajšła ŭ dom i raskazała pra toje, što zdaryłasia, sužycielu.
Sudmiedekśpiertyza pakazała, što dziaŭčynka była žyvaja i pamierła ad miechaničnaj aśfiksii z-za zakryćcia dychalnych šlachoŭ źmieścivam vyhrabnoj jamy. Taksama ŭ kryvi małoj znajšli etyłavy śpirt.
Heta śviedčyć pra toje, što žančyna napiaredadni rodaŭ užyvała śpirtnoje. Vyśvietliłasia taksama, što fihurantka nieadnarazova rabiła aborty i ad adnaho dziciaci admoviłasia jašče ŭ raddomie.
— Sudova-psichijatryčnaja ekśpiertyza ŭstanaviła, što padčas ździajśnieńnia złačynstva abvinavačvanaja mahła ŭśviedamlać faktyčny charaktar i hramadskuju niebiaśpieku svaich dziejańniaŭ. Pa vynikach rasśledavańnia žančynie vystaŭlena abvinavačańnie pa častcy 1 artykuła 144 «Pryčynieńnie śmierci pa nieaściarožnaści», — adznačyła Anastasija Jałtušenka.
Padčas śledstva žančyna ŭsio śpisvała na vypadkovaść i dziejańnie ałkaholu. Sud pryhavaryŭ jaje da 2,5 hoda pazbaŭleńnia voli.