U Danii abjavili daterminovyja parłamienckija vybary

Premjer-ministarka Danii Miete Frederyksien abjaviła pra praviadzieńnie daterminovych parłamienckich vybaraŭ, jakija pryznačanyja na 24 sakavika.

Miete Frederyksen na Miunchienskaj kanfierencyi 2026 hoda. Fota: AP Photo/Michael Probst

Choć paŭnamoctvy dziejnaha składu parłamienta zakančvajucca mienš čym praz hod i vybary pavinny byli adbycca nie paźniej za 31 kastryčnika, urad vyrašyŭ paskoryć hałasavańnie. Miarkujecca, što hetaje rašeńnie źviazana z rostam padtrymki kiroŭnaj Sacyjał-demakratyčnaj partyi na fonie rezkich zajaŭ prezidenta ZŠA Donalda Trampa nakont mahčymaj anieksii Hrenłandyi.

Miete Frederyksien paviedamiła, što prapanavała karalu Danii Frederyku pryznačyć vybary na 24 sakavika. Padčas vystupu ŭ parłamiencie ŭ Kapienhahienie jana adznačyła, što, niahledziačy na pačatak vybarčaj kampanii, mižnarodnaja situacyja zastajecca napružanaj, a kanflikt vakoł Hrenłandyi jašče nie vyčarpany. Pavodle jaje słoŭ, urad praciahnie adstojvać intaresy Danii.

Choć u śniežni sacyjał-demakraty paciarpieli istotnuju parazu na municypalnych vybarach, ciapier ich rejtynh prykmietna vyras dziakujučy aktyŭnaj pazicyi premjerki ŭ abaronie suvierenitetu krainy. Apošnija apytańni pakazvajuć, što partyja moža atrymać kala 22% hałasoŭ — amal udvaja bolš, čym jaje najbližejšyja kankurenty, «Zialonyja levyja».

Zaraz partyja Frederyksien uvachodzić u kaalicyju ź libierałami-centrystami i ŭmieranymi, adnak častka jaje prychilnikaŭ vystupaje za bolš ščylnaje supracoŭnictva ź levymi siłami. Sama premjerka pakul nie vyznačyłasia, z kim budzie farmavać urad u vypadku pieramohi, padkreśliŭšy, što ŭ ciapierašnich umovach nie choča zahadzia vyklučać nivodzin z mahčymych varyjantaŭ.

Kamientary da artykuła