«Rastaje śnieh, idzie doždž — my płyviom»: u Viciebsku novabudoŭlu padtoplivaje ŭžo druhuju viasnu

Žychary doma ŭ novym viciebskim mikrarajonie Nikrapolle bjuć tryvohu: viasnoj jany nie mohuć narmalna zajści ŭ padjezd praz toje, što jon padtopleny — bo ŭvachod na ŭzroŭni ziamli, a liŭniovak niama.

Skrynšot videa ŭ tyktoku

Maładaja maci ź Vicbska, jakaja padpisana ŭ tyktoku jak Eła Ściapanava, pakazała na videa, što adbyvajecca ŭ ich navabudzie. Uvajści ŭ padjezd i zastacca z suchimi nahami amal niemahčyma, bo vada ŭsiudy.

Žančyna kaža, što takaja situacyja ŭ ich užo druhuju viasnu. Rastaje śnieh, idzie doždž — žychary pakutujuć ad padtapleńnia. Bonusam dadajucca i inšyja prablemy: dach taksama padciakaje, i praz heta rehularna adklučajuć lift. A maładym siemjam, jakich u novym mikrarajonie Nikrapolle chapaje, heta ŭskładniaje žyćcio.

Situacyja asabliva kryŭdnaja tym, što dom uviedzieny ŭ ekspłuatacyju mienš za dva hady tamu.

— Chto za heta budzie adkazvać? ŽEU ci Viciebski DBK, jaki pabudavaŭ tak pachabna dom, nie praduhledzieŭšy liŭnioki? Adsutničaje hanak, vada pastupaje ŭ padjezd. Jak vyrašajuć prablemu? Pryjeduć, adpampujuć vadu — i na hetym usio. A nam z hoda ŭ hod pakutuj. Źjavicca ćvil. Hetyja kvatery dastalisia nam daloka nie biaspłatna. U nas kredyt na 20 hadoŭ bolš za tysiaču rubloŭ u miesiac.

Zakančvaje videa jana rytaryčnym pytańniem:

— U našaj krainie ŭsio dla maładych siemjaŭ. Jakim zaraz davodzicca vyčerpvać vadu. I nam tak žyć usio žyćcio?

Darečy, Eła žyvie ŭ trecim padjeździe — u pieršym i druhim takoj prablemy niama, bo tam jość hanki.

U kamientaryjach žychary susiednich damoŭ napisali, što ŭ ich taksama anałahičnyja pytańni ŭźnikajuć: «Pobač u damach padtoplivaje padvały, staić nievynosny smurod u padjezdach, tydniami mohuć stajać lifty. Pisali kalektyŭnuju skarhu, a tołku… Jany tam adno na adnaho skidvajuć adkaznaść».

Ale niechta z kamientataraŭ pasprabavaŭ abvinavacić u tym, što adbyvajecca, samich žycharoŭ doma. Maŭlaŭ, treba było čyścić śnieh usim dvarom, kab takoha nie było.

Kamientary da artykuła