Tramp zajaviŭ pra spynieńnie handlu ź Ispanijaj, bo taja nie dazvoliła karystacca svaimi vajskovymi bazami

Prezident ZŠA Donald Tramp zajaviŭ, što Ispanija paviedamiła ZŠA pra zabaronu vykarystoŭvać jaje vajskovyja bazy, i paśla hetaha Vašynhton całkam spyniaje handal z hetaj krainaj. Jon taksama dadaŭ, što kali ZŠA zachočuć, to ŭsio roŭna zmohuć vykarystoŭvać ispanskija bazy ŭ svaich metach. Hetyja słovy prahučali padčas publičnaj častki sustrečy z kancleram Hiermanii Frydrycham Miercam u Biełym domie.

Donald Tramp. Fota: AP Photo/Mark Schiefelbein

Pavodle paviedamleńniaŭ ŚMI, ispanski bok raniej zapatrabavaŭ vyvieści amierykanskija samaloty sa svaich baz na fonie eskałacyi vakoł Irana i abmierkavańnia mahčymaha pašyreńnia vajskovych dziejańniaŭ. Havorka idzie pra vajskova-marskuju bazu Rota i avijabazu Maron, jakija vykarystoŭvajucca ZŠA dla apieracyj u Mižziemnamorji i na Blizkim Uschodzie.

«Ispanija zajaviła, što my nie možam vykarystoŭvać ich bazy — i heta narmalna. Nam i nie treba. My mahli b vykarystoŭvać ich bazy, kali b zachacieli. My mahli b prosta prylacieć i skarystacca imi. Nichto nie skaža nam, što my nie možam ich vykarystoŭvać, ale nam heta nie patrabujecca. Adnak jany paviali siabie niepryjazna, i ja skazaŭ im: nam nie treba. U Ispanii niama absalutna ničoha, što nam treba, akramia cudoŭnych ludziej. U ich cudoŭnyja ludzi. […] I ciapier my źbirajemsia całkam spynić handal ź Ispanijaj. My nie chočam mieć ź Ispanijaj ničoha ahulnaha», — zajaviŭ Tramp.

Ispanija źjaŭlajecca členam NATA, a prysutnaść amierykanskich vojskaŭ rehulujecca dvuchbakovymi pahadnieńniami. Padobnaje abvastreńnie moža pryvieści da napružanaści ŭnutry aljansu i ŭskładnić adnosiny pamiž Vašynhtonam i Madrydam.

Kamientary da artykuła